Hirikoren bi patente libre gera daitezkeela ohartarazi du EH Bilduk

EH Bildu talde parlamentarioak gaur ohartarazi du Hiriko auto elektrikoaren proiektuan erregistratutako hiru patenteetatik bi libre gera daitezkeela tasak berritu ezean, eta edozein enpresak prototipoa “dohainik” garatzeko aukera izango duela.

Hiriko proiektua garatzeaz arduratu zen Jesus Echaveren Afypaida enpresa da patenteak berritu behar dituena, baina EH Bilduk “utzikeria eta zabarkeria” leporatu die Eusko Jaurlaritzari eta Arantza Tapia Garapen eta Lehiakortasun sailburuari, diru publikoarekin ordaindutako proiekturaren lizentzien jarraipena ez egiteagatik.

Hori dela eta, Igor Lopez de Muniain eta Unai Urruzuno EH Bilduko parlamentariek Tapiaren larrialdiko agerpena eskatu dute Epsilon eta Hiriko proiektuak aztertzen dituen Eusko Jaurlaritzako batzordearen aurrean. Beharrezko azalpenak eman ezean, Tapiaren “gaitzespena” eskatuko dutela adierazi dute.

Koalizioko parlamentariek azaldu dutenez, patenteak ez berritzea eta aske uztea edozein enpresak aprobetxatu dezake, 16 milioi euroko kostua izan duten patenteak dohainik erabiliz irabaziak lortzeko.

‘EAJren gertukoak’

Parlamentariek adierazi dute “EAJren gertuko pertsonen enpresak, Eusko Jaurlaritzaren eta Tapiaren onespenarekin”, patenteen askapenaz probestu daitezkeela. Hiriko garatzeko enpresen batasunaren ordezkari izan zen “Iñigo Urkidiren enpresa berria” seinalatu du EH Bilduk.

Lopez de Muniainek azaldu duenez, Afypaida enpresak Hirikoren inguruan erregistratu zituen hiru patenteetatik bi libre daude tasak ez ordaintzeagatik, baina enpresak oraindik horiek berreskuratzeko aukera izan lezake helegitea jartzen badu.

Horrelakorik ezean, auto elektrikoaren prototipoa “dohainik” garatzen jarraitzeko aukera izan lezake edozein enpresak, EH Bilduk jakinarazi duenez.

Parlamentariek Tapiari gogorarazi diote Hirikoren patenteak eta lizentziak hirugarren pertsonei ez saltzeko hitza eman zuela Eusko Jaurlaritzak.

“Utzikeriagatik ustekeria eta laguntasun kasu bateko arduradun nagusia” izatea leporatu dio Lopez de Muniainek Tapiari, eta “utzikeria eta zabarkeriagatik espoliazio” kasu baten arduraduna dela gehitu du parlamentariak.

Hilaren 4an, Epsilon eta Hiriko ikertzen dituen batzordeko presidente Carmelo Barriok (PP) lan horien uneko emaitzak aurkeztuko ditu, eta uztailaren 10ean izango da bozketa.