Guardian eta Glavista berpizteko akordioa “lortzear”, Eusko Jaurlaritzaren arabera

Eusko Jaurlaritzak akordio bat “lortzear” du bi inbertsorerekin, VSF eta Gaviota konpainiekin, hain zuzen, Aiaraldeko Guardian eta Glavista berraktibatzeko. Hala adierazi du Industria, Trantsizio Energetiko eta Jasangarritasuneko sailburu Mikel Jauregik, eta, hortaz, El Correok aurreratutako eta ondoren EITBk baieztatutako informazioa berretsi du sailburuak.

Jauregiren arabera, akordioak 80 eta 85 milioi euro arteko inbertsioa ekarriko luke, eta 400 lanpostu sortuko lituzke eskualdean. Horrela, Aiaraldeko industria-instalazio handienetako bati “irteera eta etorkizuna” emango litzaioke, azken urteotan enpresen itxierak gogor kolpatutako eskualdeari arnasa eta itxaropena emanez.

Enplegua berreskuratzea

Operazioak lantegiak itxi aurretik zuten jarduera berreskuratzea ekarriko du, beira berezien eta leihoen fabrikazioan oinarrituta. Berraktibatzeak eragin zuzena izango luke enpleguan: Guardianek 171 langile zituen, eta Autoglas/Glavistak —haizetakoen fabrikatzailea, 2020ra arte Guardianekin lotua— 240 pertsona enplegatzen zituen.

Nolanahi ere, Mikel Jauregik “zuhur” ibiltzeko eskatu du. Azaldu duenez, “filtrazioak” izan dira, eta ohartarazi du berriro ere zuhur jokatu behar dela operazioa behar bezala ixteko.

Negoziazio "konplexuak"

Jauregiren hitzetan, hilabeteak daramatzate “negoziazio oso konplexuetan”, “alderdien arteko akordioak lortzeko”. “Eragiketa ixteko, zortzi aurreakordio sinatu behar dira, eta elkar baldintzatzen dute. Dena adostu ezean, ez da ezer ere adostuko”, azaldu du.

Halaber, adierazi du Eusko Jaurlaritzari eta Arabako Foru Aldundiari dagozkien aurreakordioak jada sinatuta daudela. “Alde guztiei erantzukizuna eskatzen diegu, dagozkien aurreakordioak ixteko. Aiaraldeak eta bere etorkizun industrialak merezi dutelako”, gaineratu du.

Bestalde, Laudioko alkate Ainize Gastakak Radio Euskadin adierazi du Udalak aspalditik ezagutzen duela proposamena, “akordioa oraindik guztiz itxita ez dagoen arren”. Edonola ere, proposamena “oso interesgarria” dela baloratu du, eta, gauzatuz gero, “oso albiste ona izango litzatekeela Laudio eta Aiaralderako”.

Operazioak tokiko industria-bazkide batek parte hartzea ere aurreikusten du. El Correok argitaratutakoaren arabera, eginkizun hori Guardianen zuzendari ohi batek hartuko luke, Bizkaian egoitza duen Amine sozietatearen bidez. Gastakak operazioaren parte hori ere baieztatu du.