400 gaztek atzerrian enpresa praktikak egiteko bekak eskuratu ahalko dituzte
Guztira, 400 gaztek Global Training izeneko beka eskuratu ahalko dute atzerrian enpresa praktikak egiteko, Eusko Jaurlaritzaren arabera. Basque Trade and Investment Nazioartekotzeko Euskal Agentziaren bitartez SPRI Taldeak egin duen deialdiari esker, bekadunek batez beste zortzi hilabeteko formakuntza jasoko dute 51 herrialdetan.
Beka eskatzeko epea uztaila eta iraila bitartekoa izango da. Azaroan, 40 orduko formakuntza jasoko dute hautatuko dituzten bekadunek, eta hilabete horretan bertan hasiko dira bidaiatzen.
Gutxienez 6 eta gehienez 12 hilabeteko bekak dira. Erakunde kolaboratzaileek ahalbidetzen dituzten luzapenei esker, praktikak 8 hilabetekoak izango dira batez beste.
Global Training beken aurrekontua (4,12 miloi euro) honela banatuko dute: hilero 1.400 euro gordineko 400 beka, 6 hilabeteko iraupenarekin; entitate kolaboratzaileentzako plaza bakoitzeko 1.000 euro, gestio gastuetarako; eta 40 orduko formazio gastua, bekadun bakoitzeko eta bekadunen asegurua, bidaia eta mediku zerbitzuak barne.
Bekadunei emango zaien laguntzarekin, garraioa, sei hilabeteko ostatua, mantenua eta bestelako gastuak (bisak, adibidez) ordainduko dituzte. Hilean 1.400 euro inguruko poltsa jasoko dute praktikak egingo dituzten enpresa edo erakundeetan. Horrez gain, laguntza medikoa eta istripu eta bidaietarako asegurua izango dute.
Goi-mailako prestakuntza (graduak, lizentziaturak eta Lanbide Heziketa) egin duten 30 urtetik beherako gazteek eskatu ahal izango dute beka. B1 edo B2 ingeles maila edukitzea beharrezkoa da.
Entitate laguntzaileak
Beken kudeaketan, nazioarteko mugikortasuneko formazio-programetan esperientzia duten ondorengo entitateek parte hartuko dute: Fundacion Novia Salcedo, Ikaslan, AFM, Euskal Ganberak, Euskal Herriko Unibertsitatea, Deustuko Unibertsitatea, Mondragon Unibertsitatea, Garapen, Fomento SS, HETEL, Confebask eta Adegi.
Zure interesekoa izan daiteke
Angularen arrantza kanpainak bertan behera jarraitzea berretsi du EAEko Justizia Auzitegi Gorenak
Iazko azaroan, 2025-2026rako aurreikusitako angularen kanpaina bertan behera geratu zen EAEn, Eusko Jaurlaritzaren txostenek espeziearen egoera kritikoa egiaztatu ondoren.
Diesel litroa 2 eurotik gorakoa da jada Hego Euskal Herriko gasolindegi askotan
Gasolioaren prezioa % 30,78 igo da martxoan, Irango gerrak eragindako ezegonkortasunaren ondorioz, eta maximo berria ezarri du, litroko 1,916 eurora iritsi baita EAEn, batez beste, 2022ko uztailetik izan duen preziorik garestiena.
Euskadiko CCOOk gaitzetsi du ELAk "seinalamendu kanpaina" darabilela haren kontra, eta adierazi du euskararen aldeko jarrera "integratzailea" duela
Comisiones Obrerasek salatu du sindikatuaren aurkako manifestazio kanpaina bat darabiltzatela beste sindikatuek, euskararekiko eta hizkuntza eskakizunekiko duen jarrera dela eta. Santi Martinez idazkari nagusiak, gainera, Korrikan parte hartzeko "betoa" jarri izana gaitzetsi du, eta sindikatu abertzaleak haien kontra "erakunde ultra batek egingo lukeen moduan" jokatzen ari direla uste du.
Aste Santuan greba egingo dute Bilboko aireportuko Grounforceko lurreko asistentziako langileek
Lanuzteak martxoaren 27an hasiko dira eta apirilaren 1ean (asteazkena), apirilaren 3an (Ostiral Santua) eta 6an (Pazko Astelehena) izango lukete eragina. KPIaren diferentzialari eta erosahalmenari eustea aldarrikatzen dute langileek. Handling enpresa horrek zerbitzua ematen duen Estatuko aireportu guztietan izango dira greba-deialdiak.
Nafarroako Ekonomia eta Gizarte Kontseiluak Irango gerraren ondorioei aurre egiteko neurriak aztertuko ditu
Nafarroako Gobernuak aurreratu du Ministroen Kontseiluak ostiral honetan iragarriko dituen neurriak arretaz aztertuko dituela Nafarroan aplika daitezkeen egiaztatzeko.
"Indarberriturik eta helburua lortzetik gertuago" atera dira langile klasea eta indar sindikala, ELAren eta LABen ustez
Sindikatuen ustez, greba orokorra "klase elkartasun erakustaldia" izan da. LGS propioa lortzeko bideak zabalik daudela adierazi dute (bai patronalarekin, bai Espainiako Kongresuan) eta Jaurlaritzari eta, bereziki, EAJri, eskatu diote argitu dezala Legebiltzarrean eta Espainian dituen jarrera kontraesankorrak.
Atzoko greba orokorra "indar erakustaldia" izan zen, LAB eta ELA sindikatuen aburuz
Radio Euskadin eta Euskadi Irratian egindako elkarrizketetan LAB eta ELAko idazkari nagusiek adierazi dutenez, atzokoak "oso mobilizazio jendetsuak izan ziren, 135.000 pertsona ere batu zirela". "Indarberrituta atera gara", azpimarratu du Garbiñe Aranburu LABen koordinatzaile nagusiak.
Albiste izango dira: Greba orokorraren balantzea, Iranek Ali Larijaniren heriotza eta Ipar Euskal Herriko udal hauteskundeen bigarren itzulia
Orain-ek gaur landuko dituen albiste nagusien laburpena.
Ertzaintzak hiru pertsona atxilotu ditu greba orokorraren egunean
Desordena publikoak egitea leporatzen zaie. Gainera, bost pertsona ikertzen ari da eta 165 identifikatu ditu.
Egungo gutxieneko soldata kobratzen dutenek diote ez dela nahikoa duintasunez bizi ahal izateko
Zaintzan eta garbiketan; ostalaritzan eta turismoan; saltokietan, logistikan eta nekazaritzan… Arlo horietan ohikoa izaten da lanbidearteko gutxieneko soldata erreferentziatzat hartzea ordainsariak ezartzeko. Langileek salatzen dute jasotzen duten horrekin ezin dela bizi, eta ezinbesteko jotzen dute 1.500 eurora igotzea, duintasunez bizi ahal izateko.