Hezkuntzako aurrekontua ia 680 milioi eurokoa da Nafarroan, % 9,4 gehiago

Nafarroako Hezkuntza Sailaren aurrekontua 679,8 milioi eurokoa da, hau da, 58 milioi euro (% 9,44) gehiago 2019ko datuekin alderatuta; irakasleak kontratatzeko aurrekontu-saila, % 12,54 handitu da.

Horren barruan, nabarmentzekoa da testuliburuen doakotasuna bermatzeko partida % 43 igo dela (4,3 milioi), Nafarroako Gobernuak azaldu duenez, testuliburuen zentro gehienetan aurreikusitako berritzearen ondorioz, kontuan hartuta oro har ezarritako mailegu-aldia bost urtekoa dela.

Hain zuzen ere, 3,2 milioi bideratuko dira ikastetxe publikoetako Eskola Liburuen Doako Planari erantzuteko, eta 1,1 milioi itunpeko ikastetxeetarako.

Aipatutakoez gain, 2,6 milioi euroko partida aurreikusten du Bigarren Hezkuntzako eta Lanbide Heziketako irakasle teknikoen LEParen deialdien gastuei aurre egiteko.

Langileen gastuen hazkundea alde batera utzita, Hezkuntza sailaren aurrekontuak % 3,84 egin du gora, batez beste, gainerako kontuetan.

Garraioari dagokionez, aurrekontuan Eskola Mapa berria onartzearen ondoriozko beharrei erantzuten zaie, 280.000 euro gehiagorekin, ibilbide berrietara egokitzeko eta ikastetxeak esleitzeko behar den ibilgailu kopuruaren igoerari erantzuteko.

Eskola-garraioak 13,7 milioi euroko gastu esanguratsua dakarkio Sailari, eta horiei 900.000 euro gehitu behar zaizkie hezkuntza bereziko eskola-garraioa artatzeko, eta 357.000 euro, berriz, eskola-garraio bidezko banakako laguntzei aurre egiteko.

Azpiegiturei dagokienez, lehentasuna izan da hasita zeuden jarduketei erantzutea. Horretarako, 14 milioi bideratu dira, Ituren eta Mutiloako ikastetxe publiko berrien, Ribaforadako DBHIko lanei eta Zudaireko Las Amescoas ikastetxe publikoaren birmoldaketa egiteko.

Gainera, beste hauek ere egingo dituzte: Lezkairuko Sotoko ikastetxe publiko berriaren proiektua; hezkuntza bereziko eskolatze-beharrak direla-eta ikastetxeak egokitzea; Altsasuko eta Lekarotzeko ikastetxeetan oinarrizko ekipoak berritzea; Iruñeko Andres Muñoz ikastetxea egokitzeko eta handitzeko proiektua eta obrak egitea; eta, 2021erako obra-proiektu berriak idaztea.

Teknologien arloan, ikasNOVA hezkuntza-eraldaketa digitalerako estrategiaren aurrerapenak aurrera jarraitzen du: espazio berriak, metodologia berriak eta tresna berriak.