2.733 langabe gehiago EAEn eta 673 gutxiago Nafarroan ekainean
Ekainean, koronabirusaren pandemiaren ondoriozko alarma-egoera amaitu ondoren, 2.733 langabe gehiago izan dira Euskal Autonomia Erkidegoan (% 1,93 gehiago), 144.448 langabe dira guztira.
2019ko ekaineko datuekin alderatuta, 33.105 pertsona gehiago daude erregistratuta Lanbideren bulegoetan, hau da, % 29,73 gehiago, Lan Ministerioak ostegun honetan emandako datuen arabera.
Datuak lurraldez lurralde ikusita, Arabak izan du hazkunderik handiena ekainean, % 2,36koa, maiatzean baino 561 langabe gehiago zenbatu baitituzte bertan; 24.343 langabe guztira.
Gipuzkoan, langabezia % 2,14 igo da, 821 langabe gehiago baitaude; 39.138 guztira.
Bizkaian, berriz, igoera % 1,70ekoa izan da, ekainean guztira 80.967 langabe zenbatu baitituzte, aurreko hilean baino 1.351 langabe gehiago.
2019ko datuekin alderatuta, Gipuzkoan igo da gehien langabezia, % 35,91 hazi baita (10.341 langabe gehiago, termino absolutuetan); Araban % 30,64 egin du gora (5.710 langabe gehiago) eta Bizkaian % 26,68 (17.054 langabe gehiago).
Ekainean EAEn zeuden 144.448 langabeetako 13.676 25 urtetik beherakoak ziren. Beraz, maiatzean baino 2.375 langabe gehiago daude adin-tarte horretan.
Ekainean langabeziaren gorakada nabarmenagoa izan da emakumeen artean: 1.719 langabe gehiago zenbatu zituzten, 79.313 guztira; gizonen artean, berriz, 1.012 langabe gehiago zenbatu zituzten, 65.135 guztira.
Sektore guztietan egin du gora langabeziak, eraikuntza-sektorean izan ezik, 117 pertsona gutxiago zenbatu baitituzte.
Aurreko enplegurik gabeko sektoreak 1.597 langile gehiago hartu zituen ekainean, eta zerbitzuetan, berriz, 992 gehiago.
Nafarroari dagokionez, 673 langabe gutxiago zenbatu dituzte ekainean, aurreko hilean baino % 1,6 gutxiago. Hortaz, guztira 40.464 langabe daude, Lan Ministerioak jakitera eman duenez.
2019ko ekaineko datuekin alderatuta, 10.088 langabe gehiago daude, % 33,21 gehiago, Estatuko batez bestekoaren gainetik (% 28,09).
Kontratazioari dagokionez, 19.882 lan-kontratu erregistratu ziren ekainean, maiatzean baino % 39,4 gehiago, baina 2019ko ekainean baino % 42,5 gutxiago (14.715 kontratu gutxiago).
Espainian, guztira, 3.862.883 langabe daude, 2016ko maiatzetik atzeman ez den kopurua, 5.107 langabe gehiago baitaude. Beraz, maiatzean langabeziaren datuetan igoerak izan zuen moderazioak ildo beretik jarraitzen du.
Nestor Arana Lanbide-Euskal Enplegu Zerbitzuko Zerbitzu Orokorretako zuzendariak Euskadi Irratiko "Faktoria" saioan esan duenez, "lautadara iritsi gara; langabezia igotzen ari da oraindik baina asko moteldu da hazkunde hori". Langabearen profila ere ez dela aldatu azaldu du, "35 urtez azpiko emakume bizkaitarra" baita, horren hitzetan.
Langabeziaren igoeraren erritmoa moteldu egin da, kontratazioa suspertzen ari da eta aldi baterako lan-erregulazioan dauden pertsonen kopuruak behera egin du
Lanbide-Euskal Enplegu Zerbitzuak 144.448 langabe izan ditu erregistratuta ekainaren amaieran, 2.733 langabe gehiago erregistratu baititu (% 1,93). Horrek esan nahi du langabezia igotzeko erritmoa moteldu egin dela; izan ere, igoera martxoan (10.974 gehiago), apirilean (10.430 gehiago) eta maiatzean (3.072 gehiago) erregistratutakoa baino txikiagoa da.
"Esan dezakegu duela hilabete irudikatutako meseta egonkortzen ari dela", esan du Borja Belandia Lanbideko zuzendari nagusiak, baina honako hau gaineratu du: "Ez dugu ahaztu behar arantzaz beteriko testuinguruan jarraitzen dugula. Munduan inpaktua duen krisi ekonomikoan gaude murgilduta".
EAEn jarduera ekonomikoa eta, beraz, lan-merkatua suspertzen ari dela pentsatzera garamatzaten bi faktore gehitu behar zaizkio horri: kontratuak areagotzen ari dira eta aldi baterako lan-erregulazioko espedienteen eraginpean zeuden pertsonen % 60 lanera itzuli dira.
Ekainean, 50.631 kontratu sinatu dira EAEn, maiatzean baino % 50 gehiago, baina 2019ko ekainean sinatutakoak baino % 45,8 gutxiago dira oraindik.
Aldi baterako lan-erregulazioko espedienteak direla eta, gaur egun, 72.000 pertsona daude egoera horretan; beraz, azken asteotan uneren batean egoera horretan egon direnen % 60 (112.500) dagoeneko lanean ari dira.
Horrela, industria-sektoreak joera positiboa erakutsi du; izan ere, egoera horretan egon ziren langileen % 77 (33.500) lanean daude, eta 9.700 daude oraindik lan-erregulazioan. Aldi baterako lan-erregulaziora pertsona gehien bideratu dituen sektorea da, sektore horretako langile guztien % 30 izan baitira egoera horretan.
Zure interesekoa izan daiteke
Eusko Legebiltzarrak uko egin dio etxebizitza-edukitzaile handien erregistro bat egiteari
EH Bilduren eskariz eztabaidatu da gaia Osoko Bilkuran. Koalizioaren jatorrizko ekimena baztertu egin dute bozketan, baita Sumarren zuzenketa bat ere; aldiz, EAJren eta PSE-EEren zuzenketa bat onartu da. EH Bilduren proposamenak edukitzaile handien erregistro bat eegitea eskatzen zuen, izan pertsona fisiko naiz juridikoena, Nafarroan edo Katalunian daundenen gisan.
Interes-tasak % 2an mantendu ditu EBZk, bosgarren aldiz, merkatuek espero bezala
Europako Banku Zentraleko (EBZ) Gobernu Kontseiluak joera aldatu gabe jarraitzea erabaki du, 2025eko ekainean malgutze-zikloa eten ondoren. Ziklo horrek oinarrizko 200 puntu murriztu zuen diruaren prezioa, beheranzko zortzi doikuntzen bidez.
Hurtado sailburuak turismo-zerga 2027an EAE osoan aplikatu ahal izatea espero du
Javier Hurtado Turismo sailburuak "positibotzat" jo du aldundiek egindako foru arauaren edukia, eta hiru lurralde historikoetarako araudi "homogeneoa" dela nabarmendu du. Gainera, zerga progresiboa izatea txalotu du, "gehien duenak gehiago ordaintzea" eragingo duelako.
Bizkaian garraio publikoko deskontuak abenduaren 31ra arte luzatuko dira
14 urtetik beherako adingabeek garraioa doan izango dute urte amaierara arte eta deskontuak egongo dira Gazte tarifetan eta bidaia ugariko gainerako abonuetan. Hobari-neurriak otsailera arte zeuden indarrean, eta ostegun honetan Bizkaiko Garraio Partzuergoak erabaki du abenduaren 31ra arte mantentzea.
EAErako zerga turistikoa onartzeko aurreproiektua, martxan: eguneko 7,5 eurorainokoa izan daiteke
Egonaldi turistikoen gaineko zerga udarako indarrean izatea aurreikusten dute Araba, Bizkaia eta Gipuzkoako aldundiek. Hori bai, udalerri denetan ez da aldi berean indarrean sartuko, batzar nagusiek zerga onartu eta foru araua lurralde bakoitzeko agerkari ofizialetan argitaratu ostean, udalek sei hilabeteko epea izango dutelako udal-ordenantzak egokitzeko. Udalerri bakoitzari dagokio zerga kobratzea.
BBVAk 10.511 milioi irabazi ditu 2025ean, % 4,5 gehiago
Aldaketa-tasa egonkorra erabilita, mozkinen hazkundea % 19,2koa izan zen. Erakundeko presidenteak adierazi duenez, errekor berri horrek agerian uzten du "hazkundea eta errentagarritasuna konbinatzeko dugun gaitasuna".
ELA, LAB, CC. OO. eta ESK sindikatuek Ertzaintzak Gasteizen manifestari "baketsuen" aurka egindako "erasoak" salatu dituzte
Arabako esku-hartze sozialaren sektorean lan-hobekuntzak eskatzeko mobilizazioa egin dute Arabako hiriburuan.
Inbertitzaileen euskal partzuergoak Uvesco erosteko prozesua amaitu du
Uvesco Taldeak, BM eta Super Amara marken matrizeak, 344 establezimendu eta 7.000 langile baino gehiago ditu gaur egun. Banaketa taldeak Hego Euskal Herrian, Madrilgo Erkidegoan, Avilan, Kantabrian eta Errioxan jarduten du une honetan.
AP-15 autobidea autoentzat doakoa izango da 2029tik aurrera
2029tik aurrera Nafarbide sozietate publikoaren esku geratuko da AP-15 autobidearen kudeaketa.
Confebaskek txalotu egin du gutxieneko soldataren inguruko epaia, "bere egitekoa bete" duela erakusten duelako
Ohar batean, patronalak nabarmendu du hasieratik erabili duen argudioa ontzat eman duela epaileak. Hau da, lanbide arteko gutxieneko soldatari buruzko negoziazioa Jaurlaritzaren eskumena dela.