Tubacexeko langile-batzordeak auzitara joko du kaleratzeen kontra
Tubacexeko langile-batzordeak amaitutzat eman du kaleratzeak saihesteko zuzendaritzarekin duela hilabete hasi zuen negoziazioa, akordio batera heltzea ezinezkoa dela iritzita, eta, ondorioz, sindikatuek auzitegira joko dute beharginen eskubideen defentsan.
Lan-erregulazio espedientea negoziatzeko epea asteazken honetan bukatuko da. Laudioko eta Amurrioko lantegietan 800 behargin inguru daude. Enpresak 100dik gora kaleratu nahi ditu eta gainerakoei aldi baterako lan-erregulazioa ezarri nahi die.
"Datozen orduetan zerbait oso arraroa gertatu beharko litzateke, biharko bileran ituna egin ahal izateko", adierazi du Jonantan Garcia LABeko ordezkariak.
Hasiera batean, zuzendaritzak 150 langile kaleratzea proposatu zuen eta gero zifra hori 136ra murriztu zuen. Halaber, 12 beharginek borondatezko erretiroa hartu dute eta beste 12k lana borondatez uzteko eskaintza onartu dute, horietako biren eskakizunak atzera bota badituzte ere, LABek jakinarazi duenez.
Gauzak horrela, une honetan lan-erregulazio espedienteak 114 langilerengan izango luke eragina.
Gaurko batzarrean, lanpostuari uko egiteko baldintzak pixka bat hobetu ditu zuzendaritzak: 2012a baino lehenagoko langileei 45 eguneko kalte-ordainak ordainduko dizkiete lan egindako urte bakoitzeko; 2012tik aurrera iritsi zirenei, berriz, 33 eguneko kalte-ordainak jasoko dituzte.
Ezustekorik ez bada, biharko bilera akordiorik gabe amaituko da, eta une horretatik aurrera enpresak 15 eguneko epea izango du lan agintaritzari jakinarazpena igorri eta kaleratzeak gauzatzen hasteko.
LABeko ordezkariak azaldu duenez, sindikatuetako zerbitzu juridikoek prest dauzkate lan-erregulazio espedientea geldiarazteko demandak, baina oraindik ez dute zehaztu noiz aurkeztuko dituzten epaitegian.
Bitartean, langileek otsailaren 15ean abiarazi zuten greba mugagabean jarraituko dutela azpimarratu dute.
Albiste gehiago ekonomia
Azkoitiko Juaristi eta Aitek enpresetako langileek bizi duten "egoera jasanezina" salatu dute
Orain urtebete inguru lehertu zen lan-gatazkaren berri emateko, agerraldia egin dute bi enpresetako langileek. Uste dute zuzendaritzak "ezkutuko itxiera plan bat" duela. 130 lanpostu eta hainbat familia "arriskuan" daudela salatu dute.
Lodosako Karey Solanok konkurtsoa egingo du, eta lantegia itxi eta 36 beharginak kaleratuko ditu
Langile gehienak oso aspaldi hasi ziren lanean, eta batez beste 50 urtetik gorakoak dira. CCOOk salatu du oraindik ez dutela abuztuko nomina jaso.
Ostiralean sei hilabete beteko dira Gasteizko lorezainek grebari ekin ziotenetik, eta manifestazioa deitu dute egun horretarako
Gaur goizean Gasteizen egindako prentsaurreko batean, Enviser enpresako langileek "borrokarekin jarraitzeko" asmoa agertu dute, "soldata duinak lortu arte". Gainera, langileak akordiorako prest agertu dira, baina hori lortzeko "Gasteizko Udalaren benetako inplikazioa" beharrezkoa dela uste dute.
Zeintzuk dira BBVAren eskaintza berriaren gakoak?
Josu Ferreiro EHUko irakasleak Radio Euskadin egin duen elkarrizketa batean adierazi duenez, erakundeak Kataluniako bankuko akziodunen zati handi batek eskatzen zuenera egokitu du bere proposamena, lehen eskaintzari uko egin baitzioten, nahikoa ez zelakoan. Ferreirok zehaztu duenez, BBVAk ez du eskudirutan ordainduko, akzio propioetan baizik, eta horrek abantaila fiskala dakarkie akziodunei, zergak gutxiago ordaintzea dakarrelako. Mugimendu horrekin, Carlos Torres Vila buru duen bankuak Sabadellen akzioen merkatuko balioa berdindu du, eta horrek opak aurrera egiteko aukerak areagotu ditu, nahiz eta BBVAri berari kostu handiagoa ekarri. Hobekuntza berri bat egon litekeen galdetuta, ekonomialariak uste du zaila dela: "BBVAk argudiatu zuen Sabadellen akzioak gainbaloratuta zeudela. Orain, alde hori desagertu egin da. Beste eskaintza bat baztertu beharko litzateke, hau izango litzateke azkena", adierazi du. Elkarrizketa Boulevard saioan entzun daiteke, GUAUn, 02:50: 00etatik aurrera (jatorrizkoa, gaztelaniaz).
2026an jarriko da martxan Petronorren eta OCO Technologyren agregakin sintetikoen planta, Bilboko Portuan
Proiektua 2024an hasi zen eraikitzen, eta Europa kontinentalean agregakin sintetikoak fabrikatuko dituen lehen lantegi industriala izango da. Agregakin horiek CO2 gasa harrapatzen dute, bai ekoizpen prozesuan zehar, baita horien bizitza baliagarrian ere.
BBVAk % 10 igo du Sabadell bankua eskuratzeko eskaintza
Carlos Torres BBVAren presidenteak azpimarratu duenez, hobekuntza eginda "aparteko eskaintza" jarri dute Banco Sabadellen akziodunen esku, "balorazio eta prezio historikoarekin, eta bi bankuen batasunarekin sortutako aukera apartan parte hartzeko aukerarekin". Sabadellek, bere aldetik, erantzun du azken eskaintza "jatorrizkoa baino okerragoa" dela.
Maderas de Llodio, greba mugagabean
Langileen batzordeak salatu du enpresak produkzioaren % 40 beste lantegi batzuetara eramateko asmoa duela, eta deslokalizazioak Laudioko eta eskualdeko "lantegiaren etorkizuna arriskuan jartzen" duela.
Multiverse Computingek % 30 handituko du bere lantaldea Donostian
Software kuantikoan eta adimen artifizialean espezializatutako enpresa donostiarrak datorren urtean 60 pertsona kontratatzea aurreikusten du. 4 langile zituztela abiatu zuten konpainia 2019an, eta 260 izango dira laster.
Pentsiodunak Euskadiko hiriburuetan manifestatu dira gutxieneko pentsioak LGSarekin parekatzea eskatzeko
Ehunka pertsonak bat egin dute Gasteizen eta Donostian Euskal Herriko Pentsiodunen Mugimenduak deitutako manifestazioekin; hain zuzen ere, osteguneko Legebiltzarreko bozketan presioa egiteko, gutxieneko pentsioak Lanbide arteko Gutxieneko Soldatarekin (LGS) parekatzea eskatzeko.
Petronorreko enpresa batzordeak enpresaren egoera "tamalgarria" salatu du, eta "presio neurriekin" mehatxu egin du
Plantillako ordezkariek adierazi dute ez direla bete zuzendaritzarekin lortutako akordioak, eta nabarmendu dute "tamalgarria" dela Muskizko findegiko instalazioen egoera.