EAEren "eskaintza seguru, anitz eta jasangarria" nabarmenduko dute udako kanpainan

Eusko Jaurlaritzako Turismo, Merkataritza eta Kontsumo Sailak Euskal Autonomia Erkidegoak (EAE) bisitariei eskaintzeko duen eskaintza "seguru, anitz eta jasangarria" nabarmenduko du aurtengo udarako prestatu dituen turismo kanpainetan. Horrez gain, "nazioartean sona duen gastronomiari" garrantzi berezia egingo dio.

Javier Hurtado alor horretako sailburuak goizean aurkeztu ditu udarako bi kanpainak: bata, Espainiako Estatu mailakoa, eta bestea, "tokian tokikoa". Aurreikuspenen arabera, aurtengo uda 2020koa baino "hobea" izango da, turismoari dagokionez, pandemia aurreko datuak (2019koak) hobetu ez badira ere.

Turismo Sailak diseinatu duen estrategiak estatu mailako eta nazioarteko sustapen-ekintzak erabiliko ditu, turoperadoreen eta kazetarien edo influencer espezializatuen artean ezagutzera emateko: azoka, biltzar eta foroetan presentzia izatea; marketin-ekintzak eta gaur sailburuak aurkeztu dituen helmuga edo produktuekin lotutako kanpainak.

Udako bi kanpainek, batetik, "turismo jasangarria eta naturako turismoa" dituzte oinarrian; izan ere, aurreikusi dutenez, horixe izango da "bidaiatzeko arrazoi nagusietako bat", Hurtadoren hitzetan.

Lehenengo kanpaina uztailaren 30era arte luzatuko da, eta "Euskadi, zure momentua, lekua da" goiburua izango du. Hurtado sailburuak azaldu duenez, "gure lurraldeak turismoaren arloan dituen indarguneak azaldu nahi ditu kanpaina honek: plan eta aukera sorta zabala, eta garrantzi handia izango dute naturako turismoak eta gastronomiak. Gure lurraldearen ertz batetik bestera bi orduan irits gaitezke, tartean plan ugari eginda".

Gastronomia ardatz duen kanpaina

Horrez gain, "bisitariengana iritsi nahi dugu merezi duten omenaldia eginez", nabarmendu du Hurtadok. "Pandemiaren prozesuan une pertsonal latzei egin behar izan diegu aurre. Horregatik, orain, 2021eko uda hau, indarrak eta konfiantza berreskuratzen hasteko unea da. Era berean, kanpaina honetan gastronomia izango da azaldutako edozein planetako bidelagun aparta", erantsi du.

Horregatik, sustapen-estrategia orokor gisa, gastronomia ardatz duen gai bakarreko kanpaina bat ere prestatu da "Euskal erara" goiburuarekin, Espainiako Estatuko bidaiariengana eta bertakoengana zuzenduta.

Euskadi Turismo Bonua kanpaina ere martxan dagoela gogorarazi du sailburuak agerraldia bukatzeko. Guztira, 450.000 bonu daude eskuragarri, eta abenduaren 31ra arte erabili ahalko dira.