Lakuntza: "Arabako metalgintzako langile gehienei ez zaie ezarriko soldata igoerarik"
Arabako metalgintzan aurreakordioa lortu dute SEA patronalak eta sindikatuen ordezkaritzaren gehiengoak —LABek, CCOOk eta UGTk—, eta lan hitzarmena adostu dute 2025. urtera arte. ELAk uko egin dio akordioa sinatzeari, oinarrietan gabezia handiak daudela iritzita. Besteak beste, % 15etik gorako soldata igoera adostu dute patronalak eta sindikatuek, hitzarmena indarrean dagoen artean (2025 urtera arte), eta ondoren, gaurkotze klausula aplikatuko da KPI guztia berreskuratzeko.
Mitxel Lakuntza ELAko idazkari nagusiak Euskadi Irratian, gaur goizean, egindako elkarrizketan esan duenez, "Arabako metalgintzako langile gehienei ez zaie aplikatuko soldata igoerarik", aurreakordioan adostutako "igoera ez delako soldata errealetan aplikatuko, tauletan baizik". Azaldu duenez, enpresa gehienetan, "langileen borrokaren bidez", tauletan jasotako kopuruen gainetik dituzte soldatak. "Sinatu den igoera ez da soldata errealetara eramango eta langile gehienek ez dute euro bat ere ikusiko. Hori da, hain zuzen, ELAk eskatzen duena, soldata errealetan ezartzea igoera. Hori jaso beharko luke hitzarmenak", zehaztu du.
Aurreakordioan hainbat "aurrerapen" jaso direla aitortu du, horiek "langileen mobilizazioari esker" lortu direla nabarmenduz. Horregatik, aste honetarako deituta zeuden greba deialdiak bertan behera utzi izan ez balira, "hobekuntza gehiago lortuko" lituzketela esan du. Zentzu horretan, UGT eta LAB sindikatuen jarrera kritikatu ditu, mobilizazioei ez eustea erabaki dutelako.
Inflazioaren gorakadari aurre egiteko, Eusko Jaurlaritza errenta itunaren beharra behin eta berriz aipatzen ari den honetan, Lakuntzak Iñigo Urkullu lehendakariari galdetu dio zer den errenta ituna. "Praktikan, errenta ituna patronalak negoziazio mahaian proposatzen duena da; % 3ko igoera, KPIa % 10tik gora dagoenean. Hori al da Urkulluren errenta ituna", galdetu du.
Halaber, Hezkuntza Lege berriaren aurreproiektua ere izan du hizpide ELAko idazkari nagusiak, eta oso kritiko agertu da Hezkuntza Sailak mahai gainean jarri duen testuaren edukiarekin. "Orokorregia" dela iritzi dio, eta helburua "oraingo sistema betikotzea" dela esan du. "Ez da ezer berria proposatzen, muinean egungo sistemak jarraituko du: curriculum berria izateari uko egiten zaio, euskararen murgiltze eredua ez da garatzen eta segregazioaren arazoari ez zaio heltzen. Langileen behin behinetakotasuna amaitzeko neurririk ere ez da proposatzen", adierazi du. Egoera horren aurrean, ELA prest agertu da Jaurlaritzarekin negoziatzen jarraitzeko, baina "egoera aldatzen ez bada", grebara joatea ez dute baztertzen.
Azkenik, ostegunean Eusko Legebiltzarrean egitekoa den Politika Orokorreko Osoko Bilkuraren atarian, fiskalitatearen inguruko herri akordio zabala eskatu du, beste behin, ELA sindikatuko buruak. Salatu duenez, gaur gaurkoz "akordio bakarra dago martxan, ezer ez aldatzeko ituna". "Badago datu objektibo bat: IBEXeko enpresen irabaziak inoizko handienak diren bitartean, herritarren pobretzea azkartzen ari da. Agertoki horri aurre egiteko hartzen ari diren neurri neoliberalak ez dira egokiak. Esku-hartze publikoa behar da, ezkerreko neurriak. Jaurlaritza eta Nafarroako Gobernua, gaur egun, FMIren eskuinean daude", nabarmendu du.
Albiste gehiago ekonomia
Gasteizko lorezainak eta Enviser enpresa, akordioa lortzeko bidean
Bilera luzea izan dute ostegun honetan Precon, eta itxaropentsu irten dira. Langileak batzartuko dira eta enpresak dagozkion kontsultak egingo ditu, hurrengo bileran akordioa ixteko helburuarekin.
Lan-eskaintza publikoetan euskara blindatzeko EAJ eta EH Bilduren proposamena izapidetzea ahalbidetu dute
Eusko Legebiltzarrak bi lege proposamen izapidetuko ditu lan-eskaintza publikoetan euskara blindatzeko. EAJk bat aurkeztu du, eta PSE-EE gobernukideak ez, baina EH Bilduk babestu egin du. Koalizio soberanistak beste bat aurkeztu du, eta jeltzaleen abstentzioari esker aurrera atera da.
Irailean, langabezia-tasa % 2,02 jaitsi da EAEn, eta % 0,4, Nafarroan
2024ko iraileko datuen aldean, 1.027 langabe gutxiago (% 0,95) daude EAEn, eta 1.232 gutxiago (% 4,16), Nafarroan. Halaber, abuztutik irailera, Euskadiko Gizarte Segurantzan 11.475 lagun afiliatu dira; Nafarroan, aldiz, 719 pertsona gutxiago daude Gizarte Segurantzan izena emanda.
Alokairuen indizeak 500 euro baino gehiago jaitsi ditu Donostian eskainitako prezioak
Gipuzkoako herri tentsionatuetan, azken bost urteetan alokatuta egon ez diren edo lehen aldiz merkaturatu diren edukitzaile handien eta pisuen kontratu berriei bakarrik aplikatu beharko zaie prezio-tarte berria.
Eusko Jaurlaritzak Indartuz inbertsio funtsa sortuko du, eta 400 milioirekin hornituko du
Gainera, Finkatuz inbertsio funts publikoak estatutuak eguneratuko ditu enpresetan parte hartzeko irizpideak malgutzeko. Esaterako, ez da horretarako baldintza izango enpresak egoitza Euskadin izatea, eta nahikoa izango da lurraldean "eragina" izatea.
Mitxel Lakuntzaren arabera, CAFek Jerusalemen duen proiektua "ez da erabakigarria" enpresaren etorkizuna bermatzeko
ELAren idazkari nagusiak dioenez, "CAFek badaki tren hori hasieratik dela ilegala", eta proiektua babesteko eta "ilegalitatearekin jarritzeko argudio gisa darabilen txostena" egin duten adituak zeintzuk diren argitzeko eskatu dio enpresari. Euskadi Irratiko Faktorian hitz egin du asteazken goizean horren eta beste hainbat gairen inguruan.
Sindikatuek hiru orduko lanuztea eta hainbat manifestazio deitu dituzte euskal hiriburuetan, Gazako genozidioa salatzeko
Urriaren 15ean egingo duten lanuztearen berri eman dute LAB, CCOO, UGT, ESK, STEILAS, CGT/LKN, ETXALDE eta HIRU sindikatuek. Lanuzteak eta manifestazioak Espainiako Estatuko lantoki guztietan deitu dira.
CAFeko langileek ordu bateko lanuztea egin dute Jerusalemgo tranbiaren inguruan zuzendaritzak duen jarrera salatzeko
Ordubeteko lanuztearekin bat egin duten langileek elkarretaratzea egin dute CAFen bulego nagusien atarian. Enpresa Batzordeak enpresaren "zinismoa" salatu du Jerusalem tranbiaren proiektuaren inguruan duen jarreragatik, eta zuzendaritzari "NBEren argudioei aurre eginez bere irudia zuritzea" eta Israelen "tesiak onartzea" leporatu dio.
ELAk lanuztea deitu du urriaren 15erako enpresei, Eusko Jaurlaritzari eta Nafarroako zein Espainiako gobernuei Israelekin harremanak etetea eskatzeko
LAB, CCOO, Steilas, Solidari, Etxalde eta Hiru sindikatuek ere lanuzte orokorrak deitu dituzte Hego Euskal Herrian egun horretarako.
Donostian, 60 metro koadroko pisu baten alokairua 800 eurokoa izango da gehienez jota
Gipuzkoako erreferentziazko prezioen indizea Estatuko Aldizkari Ofizialean argitaratu ondoren, asteazken honetan indarrean sartuko da Gipuzkoako udalerri tentsionatuetan alokairuen prezioa mugatzeko aukera ematen duen araua. Irunen, 60 metro koadroko etxebizitza bat alokatzeko ezingo da 624 euro baino gehiago eskatu.