Noiz, nola eta non egin errenta aitorpena Araban, Bizkaian, Gipuzkoan eta Nafarroan?

Urtero bezala, apiriletik aurrera zergadunek iazko ekitaldiari dagokion errenta aitorpena egin beharko dute. Hona hemen zalantza guztiak argitzeko gida azkarra: datak eta prozedurak.

ARABA

Noiz? Apirilaren 7tik ekainaren 25era.

Non? Online. Rentareden bitartez (laguntza gida araba.eus/renta2024 webgunean deskarga daiteke). Identifikazio digitala behar da (BAK, BAKQ edo baleko beste bat).

Aurrez aurre. Rentarabaren bidez, aholkularitza enpresetan, gestoriatan eta Ogasunak Gasteizen, Laudion ea Guardian dituen bulegoetan (azken horietan, hitzordua aldez aurretik hartu behar da, doakoa da). Modalitate hau apirilaren 10ean abiatuko da. Aitorpena aholkularitza enpresa baten bidez egin beharko da derrigorrez ondorengo kasuetan: 2024an jarduera ekonomikoren bat egin dutenek, ohiko etxebizitza saldu dutenek, akzioak edo higiezinekin hiru operazio baino gehiago egin dituztenek edota kotizatu gabeko sozietateak saldu dituztenek.

Nola eta zenbat? Ogasunak gutunak bidaliko dizkie zergadunei, eta guztira, 149.371 autolikidazio proposamen igorriko ditu. Zirriborrok online onartu ahalko dira, identifikazio digitalarekin edo gabe. Dirua itzultzekotan, 48 orduko epean jasoko dute. Ordaindu behar izatekotan, bi epetan dago aukera (% 60, ekainean, eta gainerako % 40a, azaroan) edo ordainketa bakarrean (ekainean). Zirriborroan aldaketak egin behar izanez gero, hilaren 7tik aurrera egingo dira identifikazio elektronikoarekin.

Zergadunen % 69ri dirua itzuliko diete: batez beste, 1.340 euro. Zergadunen laurdenak ordaindu beharko du (2.090 euro, batez beste). Gainerako % 6arentzat 0 izango da emaitza. Hori da, adibidez, bizitzeko gutxieneko diru-sarrera kobratzen duten pertsonen kasua.

BIZKAIA

Noiz? Apirilaren 10etik ekainaren 30era.

Non? Online. Bizkaia.eus/errenta webgunean eta Renta Bizkaia Errenta aplikazioan, identifikazio elektronikoarekin (BAK, BAKQ edo balekoren bat).

Aurrez aurrekoa. Ogasunak eta Gertuk lurraldean dituzten 12 bulegoetan, aldez aurreko hitzorduarekin (apirilaren 8tik aurrera).

Telefono bidez. 94 608 30 00 telefono zenbakira deituta (astelehenetik ostiralera, 08:30etik 19:00etara). Kasu honetan ere identifikazio elektronikoa behar da.

Nola? Autolikidazioa jaso ostean, zergadunak onartu edo moldatu beharko du. Dirua itzultzekotan, zazpi eguneko epean jasoko du. Ordaintzeko bada, helbideratu daiteke eta uztailera arte ez da kobratuko.

10 zirriborroetatik 7 baino gehiagotan dirua itzuliko da, batez beste 1.228 euro.

GIPUZKOA

Noiz? Apirilaren 3tik ekainaren 30era.

Noiz? Online. Zergabidea plataformaren bidez, eta martxoaren 31tik aurrera, identifikazio elektronikoarekin (BAK, BAKQ edo antzekoren bat).

Aurrez aurrekoa. Apirilaren 4tik aurrera hartu ahalko da hitzordua aitorpena Ogasunak Gipuzkoan dituen 11 bulegoetako batean aurkezteko.

Mekanizatua. Honetarako ere aldez aurretiko zita behar da (hilaren 4tik aurrera). Zergadunak dokumentazioa aurkeztuko du Gipuzkoako errenta mekanizatuko zazpi bulegoetako batean, eta teknikariek autolikidazioa egiten lagunduko diote.

Nola eta zenbat? Aitorpenen % 72 itzultzekoak edo 0 kuotakoak dira, gainerako % 27ak ordaindu beharko du. Dirua hiru eguneko epean jasoko dute zergadunek, eta ordaindu behar izanez gero, ordainketa bakarrean (uztailean) edo zatika (uztailean eta azaroan).

NAFARROA

Noiz? Apirilaren 7tik ekainaren 26ra.

Non? Online. Hilaren 7tik hasita, Errenta Nafarroa webgunean, identifikazio elektronikoa behar da (NAM digitala, egiaztagiri digitala,  Cl@ve edota NAMa eta Ogasunak emandako pasahitza sartuta).

Telefono bidez. Apirilaren 14tik aurrera. Aldez aurretik hitzordua hartu behar da eta dokumentazioa bildu. Ogasuneko teknikariak aukeratutako datan eta ordutegian deituko du zergaduna eta aitorpena egingo dio.

Aurrez aurre. Apirilaren 22tik aurrera. Ogasun Departamentuak Iruñean, Tuteran, Lizarran, Tafallan eta Donezteben dituen bulegoetan. Aldez aurretiko hitzordua behar da (webgune bidez edo telefonoz). Finantza entitate kolaboratzaileen bidez ere egin daiteke.