Mitxel Lakuntza ELAko idazkari nagusi aukeratu dute berriro, % 90,37ren babesarekin

ELA sindikatuaren XVI. Kongresu konfederalak Mitxel Lakuntza aukeratu du datozen lau urteetan idazkari nagusi izaten jarraitzeko, botoen % 90,37ren babesarekin.

Lakuntza idazkari nagusia ez ezik, ELAren Batzorde Eragilea ere aukeratu dute. Zerrenda bakarra aurkeztu da eta 629 boto alde (% 90,37), 47 kontra (% 6,75) eta 18 boto zuri (% 2,5) jaso ditu. Halaber, bi boto baliogabe zenbatu dira (% 0,28).

2019ko apirilaz geroztik idazkari nagusi den Lakuntzak lau urte gehiagoz jarraituko du karguan. Halaber, duela lau urte jasotako babesa berriz bereganatu du (botoen % 90,6 jaso zuen 2021ean).

Berritasunik ere izango du Batzorde Eragileak, hiru pertsona berri sartuko baitira: Ane Bilbao Alzelai (Zerbitzu Juridikoak), Luis Fernandez Centeno (Sindikalizazioa, Militantzia, Ekintza Konfederalak) eta Unai Oñederra Egaña (Prestakuntza, Iparraldea eta Estrategia Soberanista).

ELAko zuzendaritza parekidea izango da: Mitxel Lakuntza (idazkari nagusia), Amaia Muñoa Capron-Manieux (idazkari nagusiaren albokoa eta Nazioartea), Ane Bilbao Alzelai (Zerbitzu Juridikoak), Luis Fernandez Centeno (Sindikalizazioa, Militantzia eta Ekintza Konfederalak), Leire Gallego Lopez de Goikoetxea (Ekintza Soziala, Migrazio Politikak eta Genero Berdintasunerako Politikak), Ivan Gimenez Gil (Komunikazioa), Pello Igeregi Santamaria (Negoziazio Kolektiboa, Lan Osasuna eta Euskara), Alazne Mantxola Mintegi (Diruzaintza), Aitor Murgia Esteve (Politika Sozialak, Azterketa Bulegoa eta Ingurumena), Unai Oñederra Egaña (Prestakuntza, Iparraldea eta Estrategia Soberanista), Leire Txakartegi Iramategi (Antolakuntza) eta Ane Miren Zelaia Arieta-Araunabeña (Afiliazioa, Hauteskunde Sindikalak, Informatika, Kudeaketa Sistema eta Genero Ekitaterako Plana).

Bestalde, aho batez onartu dute datozen lau urteetarako lan ildoak ezarriko dituen ponentzia atzo eta gaur Bilboko Euskalduna Jauregian bildutako 736 kongresukideek. Sindikatuak helburu gisa jarri ditu, besteak beste, sindikalismo feministarantz bidea egitea eta bere jarduna esparru sozial eta politikoetara zabaltzea.

Idazkari nagusi izendatu berritan egin duen hitzaldian, ELAk jarraitzen duen kontraboterearen eta konfrontazioaren ereduaren alde du Mitxel Lakuntzak, "horri esker lortu ditugu prekarietatearen aurkako garaipenak, eta konbenio gehiago eta hobeak".

Bide beretik, greba erreminta gisa defendatu du. Bere hitzetan "borrokarako prestatzen ez denak ez du zer eginik". Halaber, ziurtatu du ELAk greba egiteko gaitasuna daukanean, "lan-baldintzak hobetzeko ateak zabaltzen" direla.

Administrazioari eta patronalei mezua ere bidali nahi izan die, esanez grebak ekiditeko bidea "autoritarismoa utzi eta negoziatzeari ekitea" dela. Gehitu du, lehendakariaren arazoa dela "grebak egin arte" ez dela "langileekin gogoratzen".

"ELAren helburua gatazka" dela esaten dutenei, "helburua hitzarmen onak lortzea" dela erantzun die eta gogorarazi die "urtero 250 hitzarmen inguru lortzen" dituztela. 

Azkenik, sindikatuak politikan parte hartzeko eskubidea ere aldarrikatu du. "Non dago idatzita herri honetako sindikatu nagusiak ez duela zilegitasunik politika egiteko?", galdetu du. Euskadirentzat soldata minimoa eskatzen duenean politika egiten duela aldarrikatu du, eta estatus politiko berri bat eskatzean ere hala egingo duela azaldu du.