Kordoban desagertutako bi adingabeen aita atxilotu dute

n 8an Kordobako parke batean desagertu ziren 6 eta 2 urteko neska-mutikoen aita atxilotu du Polizia Nazionalak, auzia ikertzen ari diren iturriek jakitera emandako datuen arabera. Hilketa eta salaketa faltsuaren ustezko delituak egotzi dizkiote. Atxilotua horren gurasoen "Las Quemadillas" izeneko lursailera eraman dute, adingabeen bila hasi zirenean miatu zuten lehen tokietako bat izan zen arren.

Adingabeen aitak aurkeztutako bertsioaren arabera, urriaren 8an Cruz Conde parkean, 18:30 aldera, umeekin jolasten zebilela, adingabeak galdu zituen. Atxiloketaren unean, haren eskubideen berri eman diote aitari.

Estatuko Segurtasun Indarrek adingabeak bilatzeko lanetan jarraitzen dute, eta Poliziak ez du oraindik hipotesirik baztertu. Besteak beste, umeak desagertu ziren inguruan segurtasun kamerek hartu zituzten irudiak eta horien aitak desagertu ziren egunean egin zituen deiak ikertzen ari dira, baina oraindik ez dute emaitzarik lortu.

Aitak salaketa jarri zuen

Aurreko astean atxilotua birritan joan zen Kordobako Campo Madre de Dios kaleko polizia-etxera deklaratzera, salatzaile eta lekuko gisa, berak salatu baitzuen ustezko desagertzea.

Haiek ustez desagertu ziren parkean zegoen lekuko batek azaldu duenez, aita "oso urduri" ikusi zuen umeak bilatzen. Hori ikusi zuen pertsona bakarra omen da, egun hartan parkean egon ziren gainerako pertsona guztiek ez baitzuten ezer arrarorik ikusi, Poliziaren arabera.