Urdako istripuan hildako 69 pertsonetatik 56 identifikatu dituzte

Datuak Integratzeko Espainiako Zentroak (CID) jakinarazi duenez, asteazkenean Urdan (Toledo) izandako tren istripuan hildako 69 pertsonetatik 56 identifikatu dituzte. Gehienek (54) Espainiako nazionalitatea dute, eta bi atzerritarrak dira (frantses  eta portugaldar bana). Zendutakoek behin-behineko kopuruak berdin jarraitzen du (69). 

Gainerako 13 identifikazioak "datozen orduetan" egingo dituzte, eta susmoa dago guztiak atzerritarrak direla. Hortaz, nazioarteko lankidetza beharko da identifikaziook burutzeko. 

Identifikazio gehienak (52) hatz marken bidez egin dituzte, eta beste laurak, DNAren bidez. 

Toledoko eta Ciudad Realgo Auzitegi Medikuntzako institutuetan buru-belarri ari dira asteazkenetik. 
  
51 hildakoren —33 gizon eta 18 emakume— senitartekoei jakinarazi diete zoritxarreko berria. Gainerako bostei "ahalik eta azkarren" komunikatuko diete. Zentroak azaldu duenez, biktimaren familiari "aurrez aurre" jakinarazten zaio heriotza, eta hori eginda eransten da hildakoa estatistika ofizialean. 36 gorpu senitartekoen esku utzi dituzte jada. 

Ospitalean dauden zauritutakoen kopuruak behera egin du gaur: 34 izatetik 31 izatera. Horietatik 13 lagun Zaintza Intentsiboko Unitatean (ZIU) dituzte. 
  
Desagertze salaketei dagokienez, 13 dira oraindik, denak atzerritarrei dagozkie: 4, AEBkoak; 2na, Australiakoak eta Japoniakoak, eta bana, Argentina, Kanada, Mexiko, Txekiar Errepublika eta Tunisiakoak.