Etxegabetzeen aurkako protestak PPren egoitzetara eraman dituzte

Ehunka pertsonek protesta egin dute PPren egoitzen aurrean, Euskal Herriko hiriburuetan. Etxegabetzeen aurkako plataformak deituta (PAH), Hipoteka Lege "bidegabeak sortu duen drama soziala" salatu dute manifestariek.

Gasteizko escrache-a Araban egin den aurrenekoa izan da. Ertzaintzaren baimenik ez dute jaso manifestariek, eskakizuna garaiz egin ez dutelako. Horrela, kate bat osatu dute eta jai giroan PPren egoitzari bueltak eman dizkiote.

Oihuka "hurrengo etxegabetua diputatu bat" izatea eskatu dute 200 bat manifestarik. Plataformako bozeramaileek Iñaki Oyarzabal PPko idazkari nagusiari gutun bat eman diote. Legegintzako herri ekimenaren aurka ez egiteko eskatu diote PPri.

Donostian eta Bilbon

Stop Desahucios Gipuzkoak elkarretaratzea egin du arratsaldean, Donostiako PPren egoitzan. Poliziak estu hartu ditu eta debekuari helegitea aurkezteko aukera aztertzen ari direla esan du Mikel Sanchez plataformako bozeramaileak. Helegitea aurkezteko 48 ordu ditu plataformak.

Hipotekak kaltetutakoen plataformako kideek elkarretaratzea egin dute gaur goizean Bilboko PPren egoitzaren aurrean. Escrachea-k egiten jarraitu egingo dutela azpimarratu dute, nahiz eta Ertzaintzak politikoen etxeen aurrean deitutakoak debekatu dituen.

"Bizitzak jokoan daude eta diputatuek ez dute ikusi nahi" lelopean, hogei bat lagunek elkarretaratzea egin dute gaur goizean, Hipoteken Legearen aurrean PPk defendatutako jarreragatik.

Plataformako kideek kalean egin dute protesta eta, ondoren, PPko egoitzara igo dira, bilera bat eskatzeko idazki bat uzteko.

Gaurko elkarretaratzean ez da istilurik izan, eta Ertzaintzak ez du oztoporik jarri, atzo Donostian bestela gertatu bazen ere.

Arturo Aldekoa Bizkaiko PPko ordezkariak harrera egin die, eta bilera bat egiteko aukera aztertuko duela esan die plataforma horretako kideei.

Plataformako kideen hitzetan, gaur Madrilgo Kongresuan eztabaidagai dituzten zuzenketek beren herri ekimenaren espiritua deuseztatzen dute.

Aurreratu dutenez, hilaren 19an Leopoldo Barreda diputatua bizi den kalean beste escrache bat egiteko asmoa dute. Ertzaintzak jakinarazitako aginduaren ondorioz, Barredaren etxetik 300 metrora egin behar izango dute.

Ertzaintzak bi escrache galarazi ditu

Azken orduotan, bi escrache galarazi ditu Ertzainak, bata Donostian eta bestea Bilbon. Horren harira, Ertzaintzak berak azaldu du ez direla ekintza horiek ''debekatzen ezta oztopatzen ari''. ''Zenbait neurri ezartzen dira manifestatzeko eskubidea baliatzerakoan beste eskubide batzuk ez urratzeko'', azaldu du Segurtasun Sailak ohar baten bidez.

Ohar horren bidez, Josu Zubiaga Segurtasuneko sailburuordeak gogora ekarri du gizabanakoen eskubideak urratzeko aukera dagoen lekuetan edo guneetan egiten den edozein agerraldi, manifestazio edo aldarrikapen-ekitalditan pertsonen pribatutasuna babestea dela Ertzaintzaren betebeharra.

Politikarien jazarpenaren gaineko txostena eskatu du Estatuko fiskalak

Erkidego ezberdinetan ordezkari parlamentarioek jasaten ari diren jazarpenaren inguruko informazioa eskatuz idatzi bat helarazi die Estatuko Fiskaltza Nagusiko Idazkaritza Teknikoak erkidegoetako fiskal nagusiei, tartean Juan Calparsoro EAEko fiskal nagusiari ere.

Madrilen

Ehun pertsona baino gehiago PPren egoitzatik gertu protesta egiten ari dira 19:00etatik, Madrilgo Genova kalean. Poliziak segurtasun neurri handiak ezarri ditu eta elkarretaratzea liskarrik gabe egiten ari dira.

Manifestariak Genova kalearen eta Alonso Martinez plazaren elkargunean eseri dira. Genova kalean zirkulazioa itxi dute. Manifestariak ezin dira PPren egoitzara hurbildu, Poliziak hesi bikoitza jarri duelako. Colon inguruan antzeko dispositiboa ezarri dute.