Protestak hainbat eskolatan, LHko 3. mailako azterketen aurka

Hego Euskal Herriko hainbat eskolatako gurasoek kontzentrazioak egin dituzte gaur, Lehen Hezkuntzako hirugarren mailan Lomceri begira indarrean jarri dituzten ebaluazio azterketen kontra egiteko.

Familia horientzat aipatu azterketak "hutsalak dira, ez dutelako ikasleen benetako maila eta eskoletako hezkuntza kalitatea neurtzeko balio", eta "etengabeko ebaluazio prozesua eteten" dutelako.

Haien ustez, arau horrek "hezkuntza estrategiak eta metodologiak aldaraziko ditu, eta azterketak gainditzera bideratuko dira, ikasketa prozesura baino gehiago".

Azken hilabeteotan seme-alabek "pairatu duten estres maila" kritikatu ostean, gurasoek galdetu dute ea "zergatik egon den presioa" aipatu frogek "ustez ez badute balio akademikorik eta inolako ondoriorik ikasleentzat".

"Aspaldi ohartarazi genuen eskolak azterketak prestatzeko akademia bihurtuko zirela, eta, zoritxarrez, horixe dela errealitatea ikusten ari gara", gaineratu dute ohar batean. Hori dela eta, "seme-alabak eskolara ez eramatea" erabaki dutela iragarri dute.

"Lomcek jartzen duen oztopo lasterketaren aurrean, martxan jarritako frogari aurre egitea besterik ez zaigu geratzen", azpimarratu dute. Hala, kontzentrazioak egingo dituzte froga hori aurrera eramango duten zentroen aurrean.

Itxialdia Txantrean

Testuinguru horretan, guraso talde batek hiru orduko itxialdia egin du Txantreako (Iruñea) Bernart Etxepare ikastetxe publikoetan, ebaluazioon kontra protesta egiteko.

Gurasoek 21:00etan abiatu dute itxialdia, zentroko arduradunari eta atezainari abisu eman eta gero, baina gauerdian atera egin ditu Udaltzaingoak.

Lomceren aplikazioa

Lomceren kanpo ebaluazio estandarizatuen egitasmoa aste honetan hasi dira aplikatzen Espainiako Estatuan, Lehen Hezkuntzako hirugarren mailan, eta hizkuntza eta matematika gaitasunak neurtuko dituzte, eta ikasteko arazoak antzeman.

Ebaluazioa gaur hasi dira aplikatzen Nafarroan, eta EAEn datozen egunotan egingo dute.

Espainiako Ikasleen Gurasoen Konfederazioak (Ceapa) azterketaren aurrean nahi dutena egiteko proposatu die gurasoei, eta ez egiteko hala iritzi badiote.

Lehen hezkuntza arautzen duen dekretuaren arabera, Lomcen oinarrituta, eskolek azterketa indibidualizatuak egingo dizkiete ikasle "guztiei" hirugarren maila amaitzean.

"Azterketa gainditzen ez dutenen kasuan, irakasleek erabaki beharko dituzte hartu beharreko neurriak", dio dekretuak.

Datozen urteetan kurtso amaierako azterketak jarriko dituzte lehen hezkuntzako seigarren mailan, DBHn eta Batxilergoan, eta azterketa hori gainditu beharko dute dagozkien tituluak eskuratzeko.

Asturias, Andaluzia, Kanariak, EAE eta Katalunia azterketa hauen kontra daude.