Uriarte: 'Jantokien kontratu berria berme juridiko guztiekin egin zen'

Cristina Uriarte Eusko Jaurlaritzako Hezkuntza sailburuak ukatu egin du eskola publikoetan jantoki zerbitzua ematen duten enpresen azken lehiaketa publikoan irregulartasunik egon dela, eta kontratuak "berme juridiko guztiekin" egin zituztela azpimarratu du.

Lehiaren Euskal Agintaritzak 18,1 milioi euroko isuna jarri zien otsailean zortzi enpresari, prezioak adosteagatik. Jantoki zerbitzua eskaintzen duen enpresa batek jarritako salaketa izan zuen Agintaritzak isuna jartzeko oinarri. Gaur jakin denez, enpresa horrek otsailean egin zen lehiaketa publikoa ere ikertzeko eskatu dio Fiskaltzari, irregulartasunak atzeman baititu berriro.

ETB1eko "Egunon Euskadi" saioan egin dioten elkarrizketan, sailburuak gezurtatu egin du halakorik gertatu izana, eta kontratu berrien inguruko informazio guztia emateko prest agertu da. "Guk ez dugu arazorik hori guztia argitzeko. Kontratu berria berme juridiko guztiekin egin genuen", esan du.

Uriarteren hitzetan, aurreko kasuan ere, azalpen guztiak eman zituen Hezkuntza Sailak, eta auzia "Fiskaltzaren esku" dagoela nabarmendu du.

Beste salaketa bat aurkeztu du enpresak

Vocento taldeko egunkariek gaur ateratako informazio bat dela-eta galdetu diote jantoki zerbitzuen auziaz Uriarteri. Horren arabera, merkatuaren banaketa salatu zuen enpresak, Aibak gipuzkoarrak, otsailean egindako lehiaketa publikoaren adjudikazioak ikertzeko eskatu dio Fiskaltzari, isuna gorabehera, zerbitzu hori emango duten enpresak aukeratzeko sistema ez dela aldatu argudiatuta.

Lehiaketan izandako datu "deigarri" batzuk aipatu ditu enpresak bere salaketan. Datu horiek eskuetan, Aibakek esan du zerbitzua eskaintzen duten enpresa guztiak ez direla baldintza berdinetan lehiatzen.

Salaketan jasota dagoenez, enpresa hau lehen aldiz aurkeztu ahal izan da lehiaketa publikora, Aenorrek egindako kontu-ikuskaritza bat gaindituta. Aibaken arabera, lehen beste enpresa batek egiten zuen ikuskaritza, eta oraingoan gainditu egin dute, aldaketarik egin ez badute ere. Beste kontu bat ere salatu du enpresa gipuzkoarrak: konpainiei "fakturazio kopuru minimo bat" eskatzen diete, eta hori desabantaila argia da inoiz horrelako zerbitzurik eskaini ez duten enpresentzat. Azkenik, lehiakide bakarra izan zuen lotearen kasua aipatu du Aibakek. Lehiaketa esleitu gabe utzi eta berria atera beharrean (araudi berriak jasotakoa betez), aurretik zerbitzua eskaintzen zuen enpresari eman zitzaion automatikoki.

Horiek guztiak kontuan hartuta, eta isuna gorabehera, eskoletan jantoki zerbitzua eskaintzen duten enpresak aukeratzeko eredua ez dela aldatu uste du salaketa jarri duen enpresak.