Ordiziako agerraldia baretzen ari da, baina foku txikiak utzi ditu gertuko herrietan

27 positibo atzeman dituzte azken 24 orduetan EAEn PCR proben bidez. Kasu berrietatik 14 Gipuzkoan atzeman dituzte (oso zabalduta daude kasuak), 11 Bizkaian eta bi Araban.

Gainera, 36 kasu atzeman dituzte test azkarren bidez (proba horiek pertsona batek hartutako immunitatea edo sortutako antigorputzak neurtzen dituzte, eta iraganeko infekzio bat adieraz dezakete).

Ordiziako agerraldiari dagokionez, gutxienez 75 dira orain arte kutsatuak, larunbatean baino bost gehiago, Nekane Murga Osasun sailburuak jakitera eman duenez. Horren esanetan, Ordiziako "bigarren mailako kutsatzeek" zenbait foku eragin ditu gertuko herrietan, Tolosan, kasu.

"Gure zaintza lanak erabat aktibo jarraitzen du, eta beharrezkotzat jotzen diren neurri guztiak hartzen eta egokitzen joango gara, unean uneko egoeraren arabera", esan du Murgak. Hala, neurri berriak hartzeko pandemiaren datuak eta bilakaera aztertzen ari direla nabarmendu du Osasun sailburuak, segurtasun-distantzia mantendu daitekeen tokietan maskara nahitaez erabiltzea agintzea baztertu gabe.

Azken orduetan ez da inor hil COVID-19ak eraginez, eta pandemia hasi zenetik hil direnak 1.622 dira, oraingoz.

Guztira, 4.262 proba egin dituzte azken 48 orduetan (3.940 PCR eta 322 test azkar) eta herri hauetan atzeman dituzte positiboak:

Gipuzkoan: Aizarnazabal (bat), Andoain (bi), Elgoibar (bat), Getaria (bi), Hernani (bat), Irun (bat) eta Tolosa (sei). 

Bizkaian: Bermeo (bat), Bilbo (bost), Derio (bat), Portugalete (bat), Santurtzi (bat), Sestao (bat) eta Sopela (bat).

Araban: Gasteiz (bat) eta Urkabustaiz (bat).

Ospitaleetako egoerari dagokionez, lau pertsona daude une honetan ZIUn ospitaleratuta. Osasun Sailak eman ditu datuak ezagutzera, eguneroko prentsa-oharrean.

Koronabirusa atzemateko proban aurretik positibo emandako 20 pertsonak negatibo eman zuten atzo, eta bost pertsonak alta jaso zuten ospitalean.

1,45 da gaurko R0 indizea (atzo 1,56 zen).

Gaixotasuna gainditu duten herritarrei dagokienez, aurretik positibo eman duten 14.112 gaixok eman dute negatibo jada, eta 4.381 pertsonak jaso dute ospitaleko alta.

Gestamp enpresako zortzi langilek positibo eman dute Abadiñon

Bestalde, Gestamp enpresak Abadiñon (Bizkaia) duen lantegiko zortzi langilek positibo eman dute koronabirusean, test azkarreko probetan.

Ondorioz, gaitza atzemateko detekzio-probetan positibo eman duten langileak gaur ez dira haien lanpostuetara joan, eta PCR probak egin dizkiete uneotan gaitza duten edo ez jakiteko, konpainiako bozeramaile batek Efe albiste-agentziari baieztatu dionez.

Zortzi langileei test azkarrak egin zizkieten, enpresa horren ohiko protokolo bati jarraituz, iturri horren arabera.

Prozedura horri jarraiki, Abadiñon automobilgintzaren sektoreari lotuta dauden 700 langile baino gehiagok egingo dituzte detekzio-probak datozen egunetan.

Halaber, zortzi langileei egindako PCR proben emaitzak "datozen orduetan" jakingo dira, ordezkari beraren arabera.

Positiboak baieztatzen badira, enpresak bestelako neurriak hartuko ditu, koronabirusari aurre egin eta agerraldiak saihesteko.

Inportatutako COVID kasuen "kopuru handiaz" ohartarazi du Osasun Sailak

Nekane Murga Osasun sailburuak onartu du "kezkatu" egiten duela beste herrialde eta autonomia erkidego batzuetatik inportatutako COVID kasuen "portzentaje handiak", eta "pozik" agertu da Ordiziako fokuaren bilakaerarekin, nahiz eta inguruko herrietan "adar posibleak" aztertzen ari diren.

Gobernu Kontseiluaren ostean egindako prentsaurrekoan, Murgak azaldu du deseskalatzea amaitu ondoren mugikortasuna berreskuratzeak Euskadira ekarri duela kanpoan zeuden eta senitartekoak ikustera etorri diren euskal herritarrak eta "eragin handiagoko eremuetatik" datozen langileak Euskadira iristea.

Ildo horretan, Eusko Jaurlaritza Kanpo Osasunarekin eta beste autonomia erkidego batzuekin harremanetan dagoela azaldu du, nekazaritza sasoikako langileei buruzko informazio gehiago trukatzeko.

Nafarroak 17 positibo zenbatu ditu

Osasun Sailak hamazazpi kasu positibo berri zenbatu zituen atzo. Horietatik lau Iruñerriko agerraldiari dagozkio, zortzi kasu guztira. Hilaren 6ko bazkariaren agerraldiak beste bi kasu berri izan ditu, eta horrek 23 kasu pilatu ditu.

Halaber, atzoko positiboen artean zazpi kasu daude familian kontaktu bidez kutsatutakoak, eta lau kasu ez lirateke aurretik izandako agerraldiekin lotuta egongo. Ez da berrikuntzarik izan uztailaren 9an Tuteran hasitako agerraldian ezta Sunbillan ere, azken 14 egunetan ez baita kasu berririk zenbatu.

Ospitale-egoerari dagokionez, atzo ez zen mugimendurik egon, ez altan, ez ospitaleratzeetan; beraz, egoerak egonkor jarraitzen du oraingoz, eta gela aruntetan ospitaleratutakoen kopurua hamabikoa da, baita zainketa intentsiboetako unitatean dagoen beste pertsona bat ere. Ez da heriotzarik izan.

Kutsatzeak 263ra igo dira Espainian

Azken 24 orduetan hautemandako koronabirus kutsatzeen kopurua 263ra igo da, atzo baino ehun bat gehiago, eta zazpi egunetan zenbatutakoak 4.297ra igo dira, horietatik 803 sintomekin.

Gainera, aste honetan zortzi pertsona hil dira (hiru Gaztela eta Leonen eta gainerakoak Andaluzian, Gaztela-Mantxan, Katalunian, Madrilen eta Euskadin); pandemia hasi zenetik, guztira, 28.409 pertsona hil dira, Osasun Ministerioak astelehen honetan zenbatutakoak baino hiru gehiago.

Bestalde, bere azken estatistikaren arabera, kasu berriak Aragoiko erkidegoan gertatu dira: atzo 81 positibo eman zituzten PCR bidez, ondoren Katalunia (66), Andaluzia (26) eta Madril (25).

Erkidegoek beste 666 positibo zenbatu  dituztela jakinarazi diote Osasunari, eta, beraz, dagoeneko 256.619 kasu baieztatu dituzte Espainian. Kopuru horren arabera, kaltetuen artean bederatzigarren postuan dago Espainia, Estatu Batuen (3.296.599), Brasilen (1.884.967), Indiaren (906.752), Errusiaren (739.947), Peruren (330.123), Txileren (317.657) eta Mexikoren (304) atzetik.

123 agerraldi aktiboen % 45en jatorria familia-bilerak dira

Salvador Illa Osasun ministroak astearte honetan azpimarratu duenez, kontuz ibili behar da familia-bileretan, Espainian une honetan aktibo dauden 123 koronabirus agerraldien % 45en jatorria direlako.

Horrela mintzatu da illa Senatuan, Gobernua kontrolatzeko egindako saioan, eta guztien artean biltzeko agerraldiei aurre egiteko, birusak "hor jarraitzen duelako", pandemia kontrolatzea "ahalegin handiz" lortu den arren.

Ministroak azpimarratu duenez, herritarrek ez dute jendetza bildu behar, besteak beste, futbol taldeen lehen mailarako igoerarik egin behar, eta familiaren bileretan kontuz ibili behar da.