Gasteizko dantzaleku batek eta gimnasio batek COVID-19ko fokua izatea ezeztatu dute
Gasteizko kontzertu-areto eta dantzaleku batek eta gimnasio batek, KUBIK Aretoak eta K2 Gimnasioak hurrenez hurren, COVID-19ko kutsadura-fokua izatea ezeztatu dute. Mezu bana argitaratu dute, xehetasunak emateko, eta, horien bidez, WhatsApp bidez zabaldu den albiste faltsu bat gezurtatu dute.
#Koronabuloak ekimenaren bidez, Euskal Irrati Telebista koronabirusarekin lotutako albiste faltsuak geldiarazten laguntzen saiatzen ari da. 600 900 454 WhatsApp-eko zenbakia herritarren eskura dago, eta horren bidez jaso dugu sare sozialetan dabilen mezu hori. Hau dio, hitzez hitz:
"KUBIK Aretoa eta K2 Gimnasioa, Gasteizen, foku berria. PCR erabiltzaile guztiei ari zaie egiten; norbait joan bada, eta ez bada jabetu, etxean gera dadila, eta anbulatoriora dei dezala. Osakidetzak dio gimnasio bat eta dantzaleku bateko begirale bat daudela, baina ez du izenik ematen".
KUBIK Aretoaren eta K2 Gimnasioaren gezurtapena
Horren aurrean, KUBIK Aretoak eta K2 Gimnasioak, aurreko ostiralean (uztailaren 10ean), sare sozialetan, ohar bana argitaratu dute; mezuak dioena gezurtatu dute, eta gertatutakoaren gaineko zenbait xehetasun eman dituzte.
Hau dio KUBIK Aretoaren mezuak:
"KUBIK Gasteiztik, sareetan dabiltzan buloak ezeztatu nahi ditugu, eta erabiltzaileei lasaitasun-mezua helarazi nahi diegu. KUBIK EZ DA kutsaduraren fokua, eta erabiltzaile guztiei EZ ZAIZKIE PCR PROBAK EGITEN ARI. Anbulatoriora deitzea ere ez dizuegu eskatu.
Mesedez, datu, ohar eta adierazpen OFIZIALEI soilik egin kasu; Osakidetzak egindakoei edo guk geuk egin edo emandakoei.
Hainbat bulo eta zurrumurru dabiltza, eta, beraz, uste dugu komenigarria dela berriro ere jendaurrean hitz egitea, KUBIKen zer gertatu den zehazteko. Atzo esan genizuen moduan, oso zaila egiten zaigu gauean zehar gure aretoan gertatzen diren egoera guztiak kontrolatu edo kudeatzea, nahiz eta edukiera % 40tik behera dugun. Horregatik, aretoko langile batek COVID-19agatik positibo eman ahal zuelakoan, atzo ixtea erabaki genuen.
Gaur jakin dugu ofizialki langileak positibo eman duela. Oso ondo dago, etxean, koarentena betetzen. Lehen unetik, Osakidetzarekin harremanetan gaude, eta eskatu diguten laguntza osoa eman diegu. Zurrumurru faltsurik zabaltzen ez jarraitzeko, zehaztuko dugu langileak aretoaren kanpoaldean lan egin zuela, ezarritako osasun-neurri guztiak beteta: maskara, eskularruak…
Osasun Sailetik behin eta berriro esaten ari zaigu aretoa EZ dela kutsadura-fokurik, eta azaldu digute ez dugula zertan itxi, arazorik gabe egon gintezkeela lanean. Baina zuhurrak izan nahiago dugu; atzo bezala, gaur ere itxiko dugu, eta egun batzuetan horrela jarraituko dugu.
Amaitzeko, gogoratu nahi dizuegu sare sozialetan dabiltzan zurrumurru faltsuak gezurtatu nahi ditugula. KUBIK Aretoa ez da kutsadura-fokua, eta erabiltzaile guztiei ez zaizkie PCR probak egiten ari. Osasun-agintariek eskatutako dena ari gara egiten, eta hori baino gehiago ere bai.
Mesedez, datu, ohar eta adierazpen OFIZIALAK bakarrik izan kontuan, Osakidetzarenak edo geureak".
"K2 Gimnasiotik, lasaitasun-mezua helarazi nahi diegu gure erabiltzaile guztiei. Espekulazioak saihesteko, jakinarazi nahi dizuegu erabiltzaile batek positibo eman zuela, hilaren 8an, COVID-19agatik; ebakuntza egingo diote, derrigorrezko proba batzuk egiten ari zitzaizkion, eta positibo hori eman du.
Lehen unetik, erabiltzaile hori gurekin harremanetan jarri zen, eta gu, halaber, Osakidetzarekin, egoeraren berri eman eta jarraibide eta protokolo guztiak jarraitzeko. Osakidetzari beharrezko datu guztiak eman genizkion, erabiltzaile horrekin lotuta egon zitezkeen pertsona guztiak aurkitze aldera. Osakidetza herritar horiekin guztiekin harremanetan jarri zen, PCR probak egiteko, eta, orain arte, denek negatibo eman dute. Bikotekideak eta seme-alabek ere negatibo eman dute, eta hori da, gure iritziz, daturik onena, denok lasai egon gaitezen. Epidemiologiatik esan ziguten beti bezala ibil gintezkeela gure instalazioetan, gimnasioa berriro ireki genuenetik ezarrita ditugun segurtasun-protokoloak kontuan izanik.
Badakigu asmo txarreko mezuak zabaldu direla WhatsAp-en eta sare sozialetan, eta beharrezkoa ez den alarmismoa sortu dela gure bazkideen artean; K2 Gimnasiotik, baina, lasaitasun-mezua eman nahi dugu, eta berretsi nahi dugu gure apustua dela kirola modu ziurrean egitea".
Beraz, biek gezurtatu dute kutsadura-fokua izatea, WhatsApp-etik dabilen mezuak dioenez. KUBIK Aretoari dagokionez, baieztatu egin dute langile batek positibo eman duela, eta etxean dagoela koarentena betetzen, sintomarik gabe; K2 Gimnasioak, aldiz, zehaztu du erabiltzaile batek eman duela positibo, eta senideak ez direla kutsatu.
Halaber, KUBIK Aretoak eta K2 Gimnasioak jakinarazi dute Osakidetzarekin batera dabiltzala lanean. Are gehiago: KUBIK Aretoaren kasuan, ezarritako segurtasun-neurriek derrigorrezkoa gainditu dute.
#Koronabuloak ekimenaren WhatsApp-en jasotako mezuez gain, Maldita.es web-orriarekin ere ari gara elkarlanean, Maldito Bulo atalaren bidez, bai eta VOSTEuskadi Elkartearekin ere. Eva Caballerok Radio Euskadin zuzendu eta aurkezten duen La Mecánica del Caracol dibulgazio-saioaren komunitate zientifikoaren laguntza ere badugu.
Zure interesekoa izan daiteke
'Kuadrilla', 2026ko sanferminak iragarriko dituen kartel irabazlea
Marta Garatea artista iruindarraren artelanak festako uneak eta pertsonaiak uztartzen ditu, kolore bero eta bizien bidez. Kartela herri-bozketaren bidez aukeratu dute, eta inoizko parte-hartzerik handiena izan da: 10.000 boto baino gehiago jaso ditu.
24 partidako zigorra ezarri diote futbol-jokalari bati epaileari eraso egiteagatik, Nafarroan
Erasoa pasa den asteburuan gertatu zen, CDA Rotxa eta UD Mutilvera C taldeek jokatutako gazte mailako futbol partidan.
Adimen artifizialarekin sortutako irudi sexualizatuak debekatu ditu Europar Batasunak
Irudi sexualizatuak nahiz haurren kontrako sexu-abusuekin lotutako edukiak sortzeko helburu bakarra duten adimen artifizialeko sistemak debekatu egingo dira 2026ko abenduaren 2az geroztik. Grok X sare sozialeko AAko tresnak sortutako ika-mikaren ondoren adostu dute neurria.
"MV Hondius" ontziak Kanaria Uharteetara heltzeko egingo duen bidea, hemen
Hantabirus kasuak atzemandako itsasontziaren bidaia maiatzaren 9an iritsiko da Kanarietara, zehazki, Granadillako industria-portura. Hortik, tripulatzaileak Tenerife Hegoaldeko Nazioarteko aireportura eramango dituzte.
Gutxienez sei kilometroko auto-ilarak AP-8 autobidean, Usurbilen, Irunerako noranzkoan
Lau autok istripua izan dute, eta erreietako bat itxita dago AP-8 autobidean, Usurbil parean, Irunerako noranzkoan. Bigarren istripu batek are gehiago zaildu du egoera, eta auto-ilara luzeak sortzen ari dira Irunerako noranzkoan.
Albiste izango dira: hantabirusaren azken ordua, Tubos Reunidosko langileen batzarra eta Gabonetako Loteriaren Igorreko auzia
Gaurkoan Orain-en albiste izango direnen laburpena, bi hitzetan.
Matxura baten ondorioz, bi gaixo zeramatzan hegazkin medikalizatuak geldialdia egin behar izan du Kanaria Handian
Bigarren hegazkina Herbereetara heldu da. Munduko Osasun Erakundearen zuzendari nagusiak azpimarratu duenez, osasun publikorako arrisku orokorrak "txikia izaten jarraitzen du". Gurutzaontzia, bere aldetik, Kanaria Uharteetara bidean da jada, eta hiru egun barru porturatzea aurreikusita dago.
Gutxienez 79 lagunek salaketa jarri dute Arratiko Zekorrak errugbi taldeak saldutako loteria txartelen auzian
Behar baino 225 partaidetza gehiago saldu zituela aitortu du Arratiko Zekorrak errugbi taldeak eta, horren ondorioz, 80 bat lagunek ezin izan dute saria kobratu: 10.000 euro partizipazioko; 2,2 milioi euro inguru, guztira.
Albanese "Gernika" aurrean: “Ikaragarria da, Gazan ikusi dudana ematen du”
Francesca Albanese Nazio Batuen Erakundeko Palestinarako errelatorea txundituta agertu da asteazken honetan Gernika Pablo Picassoren margolan ospetsuaren aurrean. Haren ustez, "gerra zibilaren suntsiketa" islatzen badu ere, Palestinako lurralde okupatuetan ikusitakoaren "isla" ematen du.
Trafikoa bere onera etorri da N-1 errepidean, bi kamioiren arteko istripuak auto-ilara luzeak eragin ondoren
Gasteizko noranzkoan izan da istripua, eta errei bat itxita egon da ia bi orduz. Behin ibilgailuak bidetik erretiratuta, pilaketak arintzen hasi dira.