74 kilo marihuana eta 30 kilo haxix aurkitu dituzte kontrol batetik ihes egindako auto batean
Ertzaintzak 74 kilo marihuana eta 30 kilo haxix aurkitu ditu GI-636 (Gaintxurizketa gaina) kontrol batetik ihes egin eta Donostiako kale batean abandonatuta utzi duten auto batean. Aurkikuntza honekin lotuta, 25 urteko bi gizonezko atxilotu dituzte, droga trafikoa eta beste delitu batzuk egotzita, eta hirugarren baten bila jarraitzen dute.
Eusko Jaurlaritzaren Segurtasun Sailak ohar batean azaldu duenez, igande goizaldean, 02:30ean, GI-636 errepidetik Irunerako noranzkoan zihoazen eta atzerriko matrikula-plakak zituzten bi autok Ertzaintzaren trafiko-kontrol batekin topo egin zuten Gaintxurizketa gainean. Polizia-dispositiboa ikustean, bi autoek noranzkoa aldatu zuten eta abiadura handian ihes egin zuten Donostia aldera. Gainerako unitateei gertatutakoaren berri emanda, patruilak autoen atzetik abiatu ziren.
Polizia atzetik zutela, bai GI-636 errepidean, bai Gipuzkoako hiriburuaren erdialdean, ihesi zihoazen bi autoek hainbat kale zeharkatu zituzten semaforoak gorrian pasatuz eta arrisku-egoera larriak sortuz gainerako gidariei eta oinezkoei.
Halako batean, autoetako bat, besteari babesa eta estaldura eman nahian ari omen zena, frenatzen eta patruila-autoaren aurrean jartzen hasi zen, "beste autoari ihes egitea errazteko asmo argiz".
Azkenean, bi auto susmagarriek bide ezberdinak hartu zituzten, eta besteari babesa eman nahian zebilen autoak abiadura handian jarraitu zuen Mirakruz kaletik Pasaia aldera. Bertan, patruila batzuek bidetik atera eta geldiarazi zuten. Autoan zihoazen bi bidaiariek (nazionalitate frantziarra dute biek) indarrez aurre egin zieten agenteei. Dena dela, handik gutxira atxilotu, eta polizia-etxera eraman zituzten.
Ia aldi berean, beste patruila batzuek Donostian, Argentinako Errepublika kalean, abandonatuta aurkitu zuten beste autoa, gidariak korrika alde egin baitzuen. Ertzaintzak ikertzen jarraitzen du ihes egin zuen gidaria identifikatzeko.
Agenteek autoa miatu zutenean, autoaren atzeko aldean, plastiko beltzekin estalita, kilo bateko marihuana poltsak (guztira 74) aurkitu zituzten, bai eta 10 kiloko hiru haxix bloke ere.
Orain arte atxilotu dituzten bi gizonezkoei droga-trafikoaren, agintaritza-agenteen aurkako atentatuaren eta agintaritzaren kontrako erresistentzia delituak leporatu dizkiete. Bi atxilotutakoak epailearen aurrera eraman dituzte jada.
Albiste gehiago gizartea
Nagore Laffage oroitu dute Iruñean, hil zutenetik 17 urte pasa direnean
Duela 17 urte hil zuen Jose Diego Yllanesek Nagore Laffage, honek 20 urte zituenean. Hura oroitzeko elkarretaratzean, dozenaka lagun bildu dira Astelehen Lilak elkarteak deituta, Asun Casasolari, Nagore Laffageren amari, babesa erakusteko. Musikaz jantzitako ekitaldian, besteak beste, Unai Hualde Nafarroako Parlamentuko presidentea, Joseba Asiron Iruñeko alkatea eta UPN, PSN, EH Bildu, Geroa Bai, PPN eta Contigo-Zurekin alderdietako ordezkariak ere izan dira.
Giako Andre Mariaren eguna ospatu dute Portugaleten
Ohitura den legez, uztailaren 1ean milaka pertsona gerturatu dira Portugaletera Giako Andre Mariaren eguna ospatzera. Egun osoko egitarau oparoa antolatu dute: prozesioaz gainera, jaitsierak, musika, herri-kirolak eta jokoak izango dira giroa alaitzeko.
Abian dira aldundiek eskaintzen dituzten udalekuak
Bizkaia, Araba eta Gipuzkoan 4.000 plaza baino gehiago eskaintzen dira 7 eta 13 urte bitarteko neska-mutilentzat. Horrez gain, 14 eta 17 urte bitarteko gazteentzat ere eskaintzen dira oporretako egonaldiak.
Argi berdea, sarreren birsalmentan prezioa igotzea debekatzen duen arauari
Espainiako Gobernuak argi berdea eman dio ikuskizunetarako sarreren birsalmentan prezioa igotzea debekatzen duen arau bati. Helburua da birsalmentan aritzen diren plataformek eta enpresek sortzen dituzten gehiegizko onurak eta espekulazioa geldiaraztea.
ELAk Bilboko Udala salatuko du, lan eskaintza publikoetan euskara maila jaisteagatik
Udalak %70etik %40ra jaitsi du 35 deialditan euskarazko hizkuntza eskakizunak egiaztatzeko baldintza eta, kasu batzuetan, erabat kendu du baldintza hori.
Nola eragiten die beroak gailu elektronikoei?
Tenperatura altuen eta bero-boladen ondorioak pairatzea ez da soilik gizakion kontua. Askotan, gailu elektronikoek, gure egunerokoan hain beharrezkoak direnek, funtzionatzeari uzten diote beroa dela eta.
Gasteiz eta Bilboko aireportua lotzen dituen autobus linea berria abian da
Lehenengo autobusa 4:30ean irtengo da Gasteiztik, eta, azkena, 21:45ean. Loiutik lehen eta azken zerbitzuak, berriz, 6:30ean eta 23:30ean izango dira, hurrenez hurren.
Aske utzi dute apirilean Bilbon gizon bat indarkeriaz hiltzeaz akusatutako gizona, kautelazko neurriekin
Ertzaintzak atzo atxilotu zuen 30 urteko gizasemea, hilketaren ustezko egilea zelakoan. Baliteke atxiloketa gehiago egitea, jakinarazi dutenez.
Gizon bat espetxeratu dute Donostian emakume bat jo eta bortxatzeagatik
Gertakariak larunbat gauean izan ziren, Udaletik baieztatu dutenez.
TAO zerbitzua, udan: Bilbo, Donostia, Gasteiz eta Iruñean izango diren aldaketa nagusiak
Bilbon, larunbatetan eta jaiegunetan zerbitzua bertan behera geldituko da, eta abuztutik arratsaldetan gauza bera gertatuko da. Gasteizen, abuztuaren 4tik 31ra bitartean ez da zerbitzua ordaindu beharko. Aitzitik, Donostian larunbat arratsaldeetara eta igande eta jaiegunetara zabalduko da, eta Iruñean, sanferminetan, eguneko 24 orduetan ordaindu beharko da.