Getxoko Romo auzoko Nagusien Etxea, eraistear

Ertzaintzak eta Getxoko Udaltzaingoak Ibar Nagusien Etxeak kudeatzen duen jubilatuen zentroa hartzen zuen Romoko Lope de Vega kaleko (Getxo, Bizkaia) eraikina hesitu dute asteazken honetan. Goizean goizetik, ertzainek inguruko hainbat kale blokeatu dituzte, eta eraikina itxi dute, baita kalean aparkatuta zeuden autoak kendu ere, udal-garabi baten laguntzaz.

Asmoa eraikina hustea da, ondoren eraitsi eta belaunaldien arteko zentro bat eraikitzeko, tokiko Udalak eta Bizkaiko Foru Aldundiak onartutako planari jarraituta.

Goizean goizetik dozenaka pertsona bildu dira inguruetan eraistearen aurka daudela adierazteko, baina, polizia-hesia dela eta, ezinezkoa zaie eraikinera hurbiltzea. Halaber, lekuko batzuek jakinarazi dutenez, Ertzaintzak hainbat bizilagun identifikatu ditu, gertaeraren argazkiak ateratzen saiatzeagatik.

Udal-gobernuak (EAJ eta PSE-EE) uztailaren 26a baino lehen eraikinetik alde egin behar zutela jakinarazi zien erabiltzaileei, hala egin ezean Ertzaintzaren Brigada Mugikorra bidaliko zutela ohartaraziz. Hala ere, Ibar Nagusien Etxeko bazkideak abisuaren aurka agertu ziren eta ez zutela euren kabuz utziko erabaki zuten.

Era berean, elkarteko presidente Paco Ramak jakinarazi duenez, epaitegian errekurtso bat jarri zuten Udalaren erabakiaren aurka. "Errekurtso hori oraindik ebatzi gabe dago, eta, beraz, uste dugu babes judizialpean gaudela". Hori dela eta, Ramak esan du gaur bertan salatuko dituztela Udaltzaingoaren burua eta Udala, "legez kanpoko jarduera baten aurrean gaudelakoan", egoera geldiarazteko eta eraikina laster eraitsiko dela babesteko.

Bere aldetik, udal-iturriek ziurtatu dute "legezko epeak" bete dituztela udal-titulartasuneko eraikina berreskuratzeko. Hala, belaunaldien arteko zentroko obrei ekiteko asmoz, udal-langileak eta haren eraikuntzaz arduratuko den enpresako langileak eraikinera sartu dira gaur, hura eraisteko beharrezkoak diren lanei ekiteko.

Jubilatuen elkarteak eta auzoko hainbat bizilagunek behin baino gehiagotan eskatu dute eraikina mantendu dezatela, "historikotzat eta auzorako beharrezkotzat" jotzen dutelako. Horregatik, Udalari eta Aldundiari belaunaldien arteko zentroa beste leku batean eraikitzeko eskatu diete.

Hala ere, Udalak ziurtatu du aurrera jarraituko duela, eta gogoratu du azpiegitura berriak mendekotasuna duten adinekoentzako 100 foru-plaza eta gazteentzako 40 udal-zuzkidura-bizitoki hartuko ditu, eta eraikinaren beheko solairuan 283 metro koadroko lokal bat, Ibar Nagusien Etxea elkartea etorkizunean birkokatzeko. Proposamen horrek, baina, ez ditu kideak pozik utzi, "ez baita nahikoa", presidentearen arabera.

Ramak azaldu du ez daudela zentro berriaren aurka, baina bai haren kokapenaren kontra. Dioenez, elkarteak 6.000 bazkide baino gehiago ditu, eta orain arte, egunero 300 pertsona inguru bildu ditu tailer eta ikastaroetan. Horregatik, uste du eskaintzen zaien tokiak ez lukeela funtzionatzeko behar den besteko leku eskainiko.

Bestalde, ohar baten bidez, gobernu-taldeak azpimarratu du "beti" egon, eta "egongo garela", kolektibo hori osatzen duten pertsonekin hitz egiteko prest, "edozein edozein erakunde, elkarte edo pertsonarekin bezala, baldin eta oinarrizko arauak beti errespetatzen badira. Ezin dugu ahaztu Udalak legezko betebeharra duela interes publikoa zaintzeko eta ondare publikoa babestu, defendatu eta zaintzeko, eta, horretarako, haren jabetza berreskuratzen saiatu behar duela, legez eta erregelamenduz ezarritako mekanismoen bidez, baldin eta jabetza hori kaltetzen bada".

Horren harira, Ibar Nagusien Etxeko presidenteak bertsio horren kontra egin eta tokiko gobernua euren eskaerei "entzungor" egiten ari dela esan du.