"Normaltasuna" nagusi Zazpikaleetara ibilgailuak sartzeko mugen lehen egunean

Bilboko Zazpikaleetako sarbideetan paratutako 30 kamerek eremura sartzen diren ibilgailuak kontrolatzeari ekin diete gaur, irailaren 1ean. Izan ere, Udalak oinezkoentzako lehentasun eremu jo du gunea, eta baimendutako edota erregistratutako ibilgailuak bakarrik sartu ahalko dira, betiere ordutegi eta denbora tarte mugatuarekin. 

Goizean sartu da indarrean Oinezkoen Lehentasuneko Eremuen Ordenantza, eta Bilboko Udaleko iturriek jakinarazi dutenez, "normaltasuna" da nagusi. Nora Abete Mugikortasun eta Jasangarritasun zinegotzia Zazpikaleetan izan da sistema berriaren nondik norakoak bertatik bertara ikusten. 

Araudi berria martxan dagoela jakinarazteko kartel eta ikurrak jarri zituzten atzo hainbat lekutan. Izan ere, erregistratutako edota baimendutakoak ez diren ibilgailuek debekatuta dute eremura sartzea, eta isunak daude aurreikusita. 

Ekaina hasieratik, euren ibilgailuak erregistratzeko aukera izan dute egoiliarrek eta merkatariek. Azken egunotan, ordea, gora egin dute nabarmen sisteman izen-emateak. Udaletik azaldu dutenez, batzuek azken unerako utzi dute izapidea, eta beste batzuk oporretan zeuden. 

Nortzuk sar daitezke?

Egoiliarrak eta merkatariak ez ezik, honakoek ere badute sartzeko aukera: bizikletak, patinete elektrikoak eta mugikortasun pertsonaleko ibilgailuak (MPI), inguruan garajeak dituztenenak, salgaien zamalanetarako eta zerbitzuak emateko ibilgailuak, larrialdi-zerbitzuak eta zerbitzu publikoak, garraio publiko kolektiboko ibilgailuak, autotaxiak eta GTIak.

Gainera, San Nikolas-Askao-Unamuno plaza ardatzetik pasatzeko baimena daukate egoiliarrek (urtean 48 bider, hilean lau bider, 30 minutuko tartean) eta Unamuno plazaren eta Aurrekoetxea kalearen arteko Prim kaleko garajeetakoek, bai eta Zazpikaleak eta Prim kalea barne hartzen dituzten TAO bereizgarria duten ibilgailuek ere. Gainerako ibilgailuek debekatuta dute oinezkoen lehentasuneko eremuan zirkulatzea, gelditzea eta aparkatzea.

Egoiliarren eta merkatarien ordutegia 08:00etatik 11:00etara da astelehenetik igandera, 21:00etatik 23:00etara astelehenetik ostegunera (lanegunetan), eta 18:00etatik 23:00etara igande edo jaiegunetan.