Mayor (Satse): "Osakidetzako langileen baldintza gogorrak hobetu behar dira arreta hobetzeko"

Satse erizainen sindikatuko Amaia Mayorrek eta Steilas hezkuntzako sindikatuko Joaquin Akarregik negoziazio kolektiboa defendatu dute langileen lan baldintzak hobetzeko eta zerbitzu publikoak indartzeko tresna gisa, Radio Euskadiko Boulevard irratian egindako elkarrizketa batean. Biek uste dute irekitako egonkortze prozesuek ez dutela berehalako konponbiderik ekarriko.

Osakidetzako ordezkari sindikalak azpimarratu duenez, enplegu ezegonkorra eta behin-behinekotasuna dira osasun publikoan konpondu beharreko arazo nagusiak. "Osasun arloan lan egiten dutenentzat oso baldintza gogorrak dira. Ahalegin guztiak egin genituen pandemian, eta orain ekaitz perfektua dator: itxaron zerrendak, atzerapenak gaixo kronikoen jarraipenean, zainketa aringarrietan eta etxeko arretan", azaldu du.

Behin behineko langileei "egun bateko edo astebeteko kontratuak egiten zaizkie, ahal den gutxiena", eta, horregatik, "beti telefonoaren zain" daude eta "ez dute inoiz atsedenik hartzen", batez ere oporraldietan lan egiten dutelako eta ezin dutelako "bizitza normala izan, familiarekin eta oporrekin". "Hori, denbora luzez, oso gogorra da, eta, azkenean, langileak asko nekatzen dira, eta sei hilabete edo urtebete eskaintzen dioten lekura joaten dira", azaldu du.

Horregatik, plantillen gastua handituz baldintzak hobetzea "etorkizunerako oinarriak jartzea" da, arreta hobetzeko eta egoera bideratzeko. "Munduko makinarik onena izan dezakegu, baina ezagutzen eta maneiatzen duten pertsonak behar ditugu, eta, batez ere, artatzen gaituzten pertsonak. Aurrean dugun pertsona beti bera izatea nahi dugu, ezagutu gaitzala eta denbora eskaini diezagula. Horiek lan baldintzak dira", esan du Mayorrek. Osasun arreta "humanizatzearen" alde egin du.

Iñigo Urkullu lehendakariaren urte amaierako diskurtsoari dagokionez, Satse sindikatuko ordezkariak "autokritika" begi onez ikusi du. "Arazo bat dugula ikusten hastea konponbidea bilatzeko lehen urratsa da", esan du.

Hala ere, Mayorrek uste du egonkortze prozesuetan deitutako LEPek ez dutela berehalako irtenbiderik ekarriko, eta deitoratu du "sindikatuok ezin izan dugula negoziazioan parte hartu". Kritikatu duenez, "LEP hau legeak behartzen duelako egiten da, ez egonkortzeko benetako borondatea dagoelako".

Steilaseko ordezkaria ados agertu da Satseko ordezkariarekin. "Egiten duten deialdi bakoitzean badirudi enplegua sortzen ari direla, baina ez da horrela, plaza horiek jada badaudelako, eta finkatzen ari direlako", azaldu du Akarregik. Uste du "milaka pertsonako kolektibo batean", hezkuntza publikoan bezala, "plaza gehiago atera beharko liratekeela behin-behinekotasuna konpontzeko".

Akarregik "klaustro egonkorrak" defendatu ditu, "jarraitutasuna" egoteko eta epe ertainera proiektuak eraman ahal izateko. Egun, behin-behinekotasuna % 30 da.

Gainera, etorkizuneko hezkuntza legeak egungo sistema dual publiko-pribatuari ez eusteko eta eskola publikoari erreferentzia zuzena egiteko beharra azpimarratu du Akarregik. "Ikusi dugu bere ibilbidea Legebiltzarrean. Guk gure ustez egokiak diren hobekuntzetan eragiten saiatuko gara", esan du.