Basurtuko Ospitaleak covid iraunkorra artatzeko unitate berria izango du otsailetik aurrera

Basurtuko Ospitaleak (Bilbo) covid iraunkorra artatzeko unitatea izango du aurki, Alberto Martinez Eusko Jaurlaritzako Osasun sailburuak Radio Euskadiko "Boulevard" saioan egindako elkarrizketa batean iragarri duenez.

Martinezek zehaztu duenez, unitate berria Neurologia sailaren menpe egongo da, baina "disziplina anitzekoa" izango da, berez, gaixotasun horrek hainbat arlori eragiten baitio. Horren arabera, otsailaren 12an hasiko dira hitzorduak ematen, eta hilabete amaierarako (otsailaren 26a aipatu du) aurrez aurreko kontsultak egiteari ekingo diote. 

Osasun Sailak gerora jakinarazi duenez, Basurtuko unitate berri horrek hiru lurraldeetako eriak artatuko ditu "hasiera batean"; asmoa, baina, Araban eta Gipuzkoan ere unitateak sortzea da.

Osasun Itunaren Mahaiko lanei buruz galdetuta, sailburuak espero du udarako martxan jartzea lantzen ari diren estrategietako "batzuk".

Horrez gain, aitortu du EAEko osasun sistema publikoak "arazoa" duela profesionalen faltarekin, eta hala jarraituko duela gutxienez "bi edo hiru urtean". "Profesionalen gabezia konpontzeke dugun gaia da, bizpahiru urte beharko ditugu egoerari buelta emateko".

Azaldu duenez, hiri eta herri handienetatik urrunen dauden osasun zentroetako plazak eta arratsaldeko txandak betetzeko dituzte zailtasun gehien.

Itxaron zerrendei dagokionez, Martinezek uste du Osakidetzan "pandemia aurreko kopuruetatik gertu" daudela. Nabarmendu duenez, osasun zentroetan "48 orduren buruan lortzen da hitzordua".