Europa Ligako finalerako hotelak 20 bider garestiago daude Bilbon eta hegaldiak 1.000-2.000 euroan

Erresuma Batuko milaka futbolzale espero dira Bilbon datorren asteazkenean. Maiatzaren 21ean, Europa Ligako finala jokatuko dute Manchester United eta Tottenham Hotspur taldeek San Mamesen, eta hitzordua negozioa egiteko erabiliko dute batzuek. Bilboko hotel, ostatu eta apartamentuetako jabeek gau horretarako (hilaren 21etik 22rakoa) jarri dituzten prezioei erreparatu baino ez dago: prezioak ohi baino 15-20 bider garestiago daude. Erresuma Batutik Bizkaiko hiriburura heltzeko ordaindu beharrekoa ere ez da makala: Manchesterretik eta Londrestik Bilbora hegaldi zuzenean etorri nahiz gero, 1.000-2.000 euro ordaindu beharko dute joan-etorriko txartelagatik.

Booking eta Airbnb ostatu turistikoen webguneak arakatu ditu eitb.eus-ek. Gaualdiaren batez besteko prezioa 60-70 eurokoa da Bilboko hoteletan. Finalaren egunerako merkeen topatu dugun ostatua 864 euroan dago, eta komuna beste pertsona batzuekin partekatu beharko dugu; hurrengo asteazkenean, maiatzaren 28an, 62 euroan. Beste adibide bat: Santutxu auzoan dagoen izar bakarreko hotelean gaua emateagatik 70 euro eskatu ohi dute; finalaren egunean, ia 1.500 euroko prezioa izango du.

Logela partekatzeko arazorik ez dutenek gaua aterpetxe batean emateko aukera dute, baina horietan ere ez dugu maukarik aurkitu: maiatzaren 21ean, 457 euroan dago; astebete geroago, 38 euroan.

Etxe oso bat alokatu nahi dutenentzat badago aukerarik. Artxandan, 8 pertsonarentzako baserri bat 7.000 euroan dago finalaren egunean. Hurrengo asteazkeneko salneurria: 850 euro. 

Are gehiago, euren etxea alokairuan jarri duenik ere badago, finalaren egunerako propio, eta hala iragartzen du Bookingen: Room For UEFA Final (UEFAren finalerako logela). 1.224 euro eskatzen ditu gela horren truke.

Airbnb plataforman antzeko eskaintzak daude, eta asko dira maiatzaren 21erako bakarrik logela eta etxea eskaintzen dutenak. Aukera merkeenak 500 eurotik gora daude.

Gaua Bilbon emateko, Bizkaira heldu beharko dira aurrena jarraitzaile ingelesak, eta hori ere ez zaie merke aterako. Manchester eta Bilbo arteko hegaldiak daude garestien, 2.000 euroan. Londrestik etortzeko salneurriak "merkeagoak" dira (1.000 euro pasatxo). Gainera, dirutza ordaindu duten zale horiek akaso ez dute bidaiatuko, hegazkin konpainiek aitortu baitute hegaldietako batzuetan overbookinga dagoela (eskura dauden txartelak baino gehiago saldu dituzte).

Horren guztiaren aurrean, "erantzukizuna" eskatu zuen atzo Leixuri Arrizabalaga Bizkaiko Foru Aldundiaren bozeramaileak. Horren hitzetan, "gizarteari ez dio batere mesederik egiten".

Bestalde, Hector Sanchez Bizkaiko Ostalaritza Elkarteko gerenteak adierazi duenez, Europako Ligako finalari begira Bilboko hotelen prezio altuengatik sortutako polemika "artifiziala eta desinformatua" da.

"Ez da egia prezioen igoerari buruz esaten ari direna, eta, aldi berean, webgune batean sartu eta gela jakin batzuen prezioa ikustea baino sakonagoa den kazetaritza-ikerketa bat" egiteko eskatu du gerenteak.