Euskadiko Erlijioen Kontseilua sortuko du Eusko Jaurlaritzak

Eusko Jaurlaritzako Ongizate, Gazteria eta Erronka Demografiko Sailak Euskadiko Erlijioen Kontseilua sortuko duela iragarri du, gaur egun EAEn dauden konfesio nagusien ordezkariak batuko dituena. Erlijioen eta kulturen arteko bizikidetza sustatzea izango du helburu “aniztasun erlijiosoa eta haren adierazpen guztien eskubide eta betebeharrekiko errespetua” oinarri hartuta eta laikotasun kooperatiboaren printzipioak gidatuta.

Nerea Melgosa sailburuak azaldu duenez, Euskadiko Erlijioen Kontseiluaren erregulazioa “aste gutxi barru onartuko da Gobernu Kontseiluan, eta udaberri honetan bertan egingo du lehen bilera”.

Kontsulta-organo hori erlijio- eta kultu-askatasunerako ekimen eta erabakietarako esparru formala izango da, aholkularitza teknikoa emateko eta erlijio-aniztasunarekin lotutako politika publikoak diseinatzen parte hartzeko.

Halaber, erlijio-errealitateen berri izateko eta gatazka-egoerei aurre hartzeko eredu proaktiboa izango du kontseiluak, tentsioak eragin ditzaketen egoerak aurreikusi eta erantzun erreaktiboak edo gorroto-diskurtsoen sozializazioa saihesteko.

Ekintza-neurri zehatzak

Helburu horiekin guztiekin, Aniztasun, Bizikidetza eta Belaunaldiarteko Elkartasun Zuzendaritzak, Ellacuria Zentroaren aholkularitzarekin (erlijio-aniztasunean aditua den erakundea), Ekintza Plana diseinatu du datozen lau urteetarako (2026-2029).

Jarduera ildo zehatzak biltzen ditu planak, hala nola hilerriak eta erritoak konfesio desberdinetara egokitzeko ehorzketa arloko plangintza autonomikoa, eta gurtza zentroen hirigintza antolamendurako arau espezifiko bat sortzea ere. Era berean, Euskadin dauden konfesio guztietako jaiegunen egutegi bat egiteko ere lan egingo da.

Planak, gainera, erlijio minoritarioei eta, oro har, erlijio-aniztasunari buruz dauden estereotipoak eta aurreiritziak saihesteko estrategia bat lantzea aurreikusten du.

Eusko Jaurlaritzak konpromisoa hartzen du, halaber, zentro publikoetan, hala nola ospitaleetan, egoitzetan eta harrera-zentroetan, erlijio-elikadurari buruzko arauetara egokitutako menuen eskaintza bermatzeko.

Azkenik, Eusko Jaurlaritzak erakunde erlijiosoekin dituen harremanetan emakumeen eta gizonen arteko berdintasun-irizpideak txertatzea bilatuko da, batez ere dirulaguntzen prozesuetan eta ordezkaritza instituzionaleko guneetan.

EAEko erakunde publikoen (Eusko Jaurlaritza, foru aldundiak eta udalak) eta erkidegoan dauden erlijio-konfesioen arteko elkarrizketarako eta lankidetzarako gune egonkor izan asmo du Kontseiluak. 

Zehazki, zortzi erlijiok hartuko dute parte, errotze nabarmendunekotzat izendatutakoak: budismoa, islama, katolizismoa, ebanjelismoa, Eliza ortodoxo errumaniarra, bahaimoa, azken egunetako santuen Jesukristoren Eliza eta Jehovaren lekukoak. Gainera, gutxiengo diren beste erlijio batzuek eta erlijioen arteko elkarrizketa sustatzen duten erakundeek ere parte hartu ahal izango dute.

Erlijioen argazkia Euskadin

Espainiako Estatuko Erlijioari eta Sinesmenei buruzko Barometroak emandako datuen arabera, 2025ean, euskal biztanleriaren gehiengoak (% 53) dio ez duela inongo erlijio sinesmenik, eta % 42k sinesmen erlijiosoak dituztela aitortzen dute. Erlijioren bateko kide direnen artean, atxikipen katolikoa da nagusi (% 34).

Gaur egun, Euskadiko Erlijioen Maparen arabera, biztanleen % 6-7 katolizismoa ez den beste konfesio batzuetakoak dira. Esaterako, biztanleen % 4,0 musulmanak dira, ebanjelistak % 1,1 eta ortodoxoak % 1,0. Aniztasun hori gurtza lekuen mapan ere adierazten da; 2024an 300 baino gehiago zeuden aktibo, Eliza Katolikoarenak kontuan hartu gabe. Horietatik 147 ziren espazio ebanjelikoak, eta 83 musulmanen gurtza lekuak.  

Aniztasun horren zati bat azkenaldiko migrazio-fluxuekin lotzen bada ere, ezin da ikuspegi horretatik soilik ulertu. Eusko Jaurlaritzaren arabera, jatorri atzerritarreko pertsonen artean badira erlijio minoritarioetakoak, bai eta erlijio nagusien jarraitzaileak ere; % 42,9 katolikoak dira, % 17,9 musulmanak, %9,8 ebanjelikoak eta % 8,4 ortodoxoak.