Bilbo, aurreikusi baino hobeto: jai giroa nagusitu da, eta trafikoak eta garraioek ez dute gainez egin

Europa Ligako finalak aurreikuspen guztiak gainditu ditu Bilbon: espero zirenak baino zale britainiar gehiago iritsi dira azkenean (70.000 inguru, uste baino 15.000 gehiago), eta hiriburuak normaltasun osoz funtzionatu du egun osoan.

Bilbok maila ona erakutsi du: hirigunea ez da blokeatu, eta trafikoak eta garraio publikoek ere ez dute gainez egin. Gainera, ez da istilu larririk gertatu, gaua nola igarotzen den ikusi arte behintzat.

Albiste hau argitaratu den unean (partida bukatu eta estadioa hustu eta gero), borroka bakan eta istilu txiki batzuk baino ez dira gertatu Bizkaiko hiriburuan, eta ondorioz zazpi pertsona atxilotu dituzte.

Oro har, jai giroa nagusitu da hirian, batez ere zaletuentzako hiru guneetan eta ohiko jai guneetan (Zazpikaleak, Poza eta Areiltza).

Finaleko lehen une kritikoa zaleak San Mamesera heldu direnekoa izan da, baina aise egin dio aurre erronkari segurtasun dispositiboak. Izan ere, pilaketarik eta aparteko istilurik gabe iritsi dira britainiarrak estadiora.

Hiru segurtasun eraztun zeharkatu behar izan dituzte zaleek, eta UEFAk taldeei bi ibilbide banandutan bideratu dituzten arren, gehienek ez diete jarraitu.

Bien bitartean, sarrerarik ez zuten 15.000 zaleek 'fan zone' guneetan eta estadioaren inguruan dauden tabernetan ikusi dute partida. Tottenhamen zaleen topagunea izan da jendetsuena.

Bigarren erronka alderantzizko bidea izan da: britainiarrak San Mamesetik atera eta autobusetara eta hoteletara joan direnean. Eta une horretan ere, modu ordenatuan egin dute.

Jai giroa

Finalak kirolaren festa zabaldu du Bilbo eta inguruetan. Atzo arratsaldetik, milaka jarraitzaile britainiarrek Zazpikaleak, Areatza eta hiriko terrazak bete dituzte, besteak beste.

Gainera, egunean zehar eguraldia izan dute lagun: zerua oskarbi, tenperatura epelak eta atsegin osoz zain duen hiri apaindua.

Manchester Uniteden eta Tottenhamen zaleak elkarrekin daude Bilboko kaleetan, normaltasun osoz; borroka bakan batzuk baino ez dira ikusi. Horietako baten ondorioz, Ertzaintzak bi pertsona atxilotu ditu, eta baita hirugarren bat ere, hiri-altzariei kalteak eragiteagatik, erakusleiho bateko kristala hausteagatik.

Imanol Pradales lehendakariak ere parte hartu nahi izan du finalean, eta goizean Areatzako topagunera joan da. Euskal Selekzioaren kamiseta jantzita zuela, beste lehendakari batekin egin du topo bertan, Gaizka Toquero Athletic Clubeko jokalari ohiarekin, hain zuzen ere.