Eusko Jaurlaritzak Trans Memoriaren Eguna izendatu du azaroaren 20a

Gobernu Kontseiluak astearte honetan onartu du Trans Memoriaren Eguna azaroaren 20an ospatzeko dekretua. "Pertsona transak ikusgarri izan daitezen beste urrats bat" dela adierazi dute.

EAEko transexualen memoria gogoratzeko eta aitortzeko data ezartzea du helburu. Horrela, joan den otsailaren 15ean onartutako 4/2024 Legean, genero-identitateagatik ez baztertzeari buruzkoan, aurreikusitakoa garatu du. 

Zehazki, lege horren 6. artikuluak euskal administrazio publikoei transen memoria zaintzen eta hedatzen lan egiteko eskatzen die, bai eta memoria jardunaldiak eta aintzatespen-guneak sustatzeko ere.

Dekretua elkarte eta erakunde sozialekin lankidetzan egin da, besteak beste, Naizen, Errespetuz eta Loratuz Lotu elkarteekin. Aukeratutako dataren proposamenean hartu dute parte, eta elkarteekin adostu dute.

Gizartea bidezkoago, inklusiboago eta dibertsitatearekiko errespetuzkoagoa izan dadin "konpromiso instituzionala indartzea" du helburu.

Trans Memoriaren Eguneko adierazpenarekin, Eusko Jaurlaritzak genero-identitateagatik diskriminazioa, bazterketa eta eskubide-urraketak jasan dituztenen memoria zaindu nahi du, eta, aldi berean, EAE "pluralago eta demokratikoagoa" izan dadin sustatu.