Euskaraldiak "mugimendu izugarria" sortu du, kalean "nahi baino txapa gutxiago" ikusi arren
Izugarria izan da Euskaraldiak sortu duen mugimendua. Inoizko herri gehien batu dira ariketara, 'belarriprest' eta 'ahobizi' kopurua orain arteko handiena izan da, eta ekimenarekin bat egin duten entitateen kopurua ere goranzko bidean da. Halere, nahi baino txapa gutxiago ikusi dira kalean, eta hori da orain aztertu beharrekoa.
Laugarren edizioa amaitu eta biharamunean egin duten lehen balorazioaren laburpena da hori. Bilbon egin dute agerraldia Euskaraldiko koordinazio mahaia osatzen duten erakundeetako ordezkariek. Han egon dira Irati Iciar, Taupa euskaltzaleen mugimenduaren lehendakaria; Javier Arakama, Euskarabidea-Euskararen Nafar Institutuaren zuzendaria; Aitor Aldasoro, Eusko Jaurlaritzako Hizkuntza Politikako sailburuordea; David Aire, Euskararen Erakunde Publikoko mugaz gaindiko harremanen arduraduna; eta Jon Kobeaga, Euskaraldiaren koordinatzailea.
Denak pozik agertu dira, uste baitute berriro ere euskararen erabilera erdigunean jartzea lortu dela eta herritar askok euren hizkuntza ohituren inguruan gogoeta egiteko baliatu dutela ariketa. "Badakigu Euskaraldia eraginkorra dela", esan dute.
Balorazio sakonagoa aurrerago egingo badute ere, ariketak utzitako lehen datuak eman dituzte gaurko agerraldian. Esan dutenez, ia 135.000 herritarrek eman dute izen edizio honetan, baina askoz gehiagok hartu dute parte ariketan. "Herri askotan izen-emateak baino txapa gehiago banatu dira".
Ifrentzuan, zenbat txapa ikusi den kalean. "Nahi baino gutxiago ikusi ditugu kalean, eta hori aztertu beharrekoa da. Zergatik pertsona batzuek txapa hartu bai, baina gero janzten ez duten", esan dute antolatzaileek. Gogorarazi dute txapa "ezinbesteko elementua" dela, ariketa modu "eraginkorrean" egiteko.
Horrekin batera, nabarmendu duten beste datua aurten ekimenera batu den herri kopurua izan da: 450 herri, "inoizko gehien". Horrek esan nahi du, sustatzaileen hitzetan, "inoizko herri gehienetan piztu dela ariketaren beharra eta antolatzeko ilusioa". Herri batzordeak "osasuntsu eta indartsu" daudela ere erantsi dute.
Bestalde, Euskaraldiarekin bat egin duten erakundeen kopuruan jarri dute azpimarra. Aurreko urteetako izen-emate kopurua gainditu eta 7.500 izan dira ekimenera batu diren entitateak, "euren kideen artean Euskaraldia sustatuz, ikusgarri eginez eta euskara gehiago erabiltzeko pausoak emanez". Berri "ezin hobea" dela diote.
Ariketa udazkenetik udaberrira ekartzea ere positiboki baloratu dute, giro onak jende gehiago erakarri duelakoan.
Orain, datuak xeheago aztertu eta ikerketa sakonagoa egitea da asmoa, hurrengo Euskaraldia "are hobeagoa" izan dadin. Zentzu horretan, edizio honetan parte hartu duten herritarrei euren bizipenen berri ematea eskatu zaie, helbide honetan.
Izugarria izan da Euskaraldiak sortu duen mugimendua. Inoizko herri gehien batu dira ariketara, 'belarriprest' eta 'ahobizi' kopurua orain arteko handiena izan da, eta ekimenarekin bat egin duten entitateen kopurua ere goranzko bidean da. Halere, nahi baino txapa gutxiago ikusi dira kalean, eta hori da orain aztertu beharrekoa.
Laugarren edizioa amaitu eta biharamunean egin duten lehen balorazioaren laburpena da hori. Bilbon egin dute agerraldia Euskaraldiko koordinazio mahaia osatzen duten erakundeetako ordezkariek. Han egon dira Irati Iciar, Taupa euskaltzaleen mugimenduaren lehendakaria; Javier Arakama, Euskarabidea-Euskararen Nafar Institutuaren zuzendaria; Aitor Aldasoro, Eusko Jaurlaritzako Hizkuntza Politikako sailburuordea; David Aire, Euskararen Erakunde Publikoko mugaz gaindiko harremanen arduraduna; eta Jon Kobeaga, Euskaraldiaren koordinatzailea.
Denak pozik agertu dira, uste baitute berriro ere euskararen erabilera erdigunean jartzea lortu dela eta herritar askok euren hizkuntza ohituren inguruan gogoeta egiteko baliatu dutela ariketa. "Badakigu Euskaraldia eraginkorra dela", esan dute.
Balorazio sakonagoa aurrerago egingo badute ere, ariketak utzitako lehen datuak eman dituzte gaurko agerraldian. Esan dutenez, ia 135.000 herritarrek eman dute izen edizio honetan, baina askoz gehiagok hartu dute parte ariketan. "Herri askotan izen-emateak baino txapa gehiago banatu dira".
Ifrentzuan, zenbat txapa ikusi den kalean. "Nahi baino gutxiago ikusi ditugu kalean, eta hori aztertu beharrekoa da. Zergatik pertsona batzuek txapa hartu bai, baina gero janzten ez duten", esan dute antolatzaileek. Gogorarazi dute txapa "ezinbesteko elementua" dela, ariketa modu "eraginkorrean" egiteko.
Horrekin batera, nabarmendu duten beste datua aurten ekimenera batu den herri kopurua izan da: 450 herri, "inoizko gehien". Horrek esan nahi du, sustatzaileen hitzetan, "inoizko herri gehienetan piztu dela ariketaren beharra eta antolatzeko ilusioa". Herri batzordeak "osasuntsu eta indartsu" daudela ere erantsi dute.
Bestalde, Euskaraldiarekin bat egin duten erakundeen kopuruan jarri dute azpimarra. Aurreko urteetako izen-emate kopurua gainditu eta 7.500 izan dira ekimenera batu diren entitateak, "euren kideen artean Euskaraldia sustatuz, ikusgarri eginez eta euskara gehiago erabiltzeko pausoak emanez". Berri "ezin hobea" dela diote.
Ariketa udazkenetik udaberrira ekartzea ere positiboki baloratu dute, giro onak jende gehiago erakarri duelakoan.
Orain, datuak xeheago aztertu eta ikerketa sakonagoa egitea da asmoa, hurrengo Euskaraldia "are hobeagoa" izan dadin. Zentzu horretan, edizio honetan parte hartu duten herritarrei euren bizipenen berri ematea eskatu zaie, helbide honetan.
Zure interesekoa izan daiteke
Gaizki aparkatzeagatik jarritako isunak egiazkoak direla ziurtatu du Hendaiako Herriko Etxeak
Bidasoa eskualdeko hainbat bizilaguni isunak kobratzeko posta bidez bidalitako gutunak iruzurra zirela zabaldu zuen ostegunean Eusko Jaurlaritzako Segurtasun Sailak.
11 urteko zigorra ezarri diote gizon bati Bizkaian, bikotekide ohiaren etxera baimen gabe sartu eta hura bortxatzeagatik
Bikotekideak izan ziren sei urtez, nahiz eta ez ziren elkarrekin bizi. 2021eko azaroan neskak amaitutzat eman zuen harremana. Gizonak, ordea, kontaktuan jarraitzeko eskatu zion, eta 2021eko azaroaren 22ko goizean emakumearen etxera sartu zen, haren baimenik gabe, eta bortxatu egin zuen.
Baskoniak ehunka zaleren babesa jasoko du Valentzian
Baskoniaren mila jarraitzaile inguru joan dira Valentziara 2026ko Errege Kopa dela eta. Eguraldia lagun, giroa ezin hobea da Baskoniako zaleen bilgunea den "Araba Etxean".
65 urtetik gorako pertsonen artean alkohol eta psikofarmakoen kontsumo handiaz ohartarazi du Eusko Jaurlaritzak
Osasun Publikoaren eta Adikzioen Zuzendaritzak egindako txosten batek agerian jarri duenez, EAEko gizonen ia % 40k egunero kontsumitzen dute alkohola, eta emakumeen artean gora egin du lo-eragileen eta lasaigarrien erabilerak.
8 urteko kartzela-zigorra Legorretan kontrako norabidean zihoala hiru pertsonaren heriotza eragin zuen gidariarentzat
Akusazioek eta defentsak akordioa adostu dute, eta akusatuak erruduna dela onartu du. Hori dela eta, ez da beharrezkoa epaiketarekin jarraitzea. Ostiral honetan Gipuzkoako Auzitegian egindako saioan, auzipetuak barkamena eskatu die biktimen sendiei, malko artean.
Bost pertsona atxilotu dituzte Iruñean, emakume etorkinak prostituitzera behartzeagatik
Emakumeak haien jatorrizko herrialdeetan erakartzen zituzten, “lan-kontratu erakargarriak” eskainiz; Nafarroara iritsitakoan, baina, mehatxatu egiten zieten eta prostituitzera behartzen zituzten.
Gizon batek 10 urteko semea hil du eta emaztea larri zauritu du bart Tenerifen
Guardia Zibilak tiroz hil du ustezko hiltzailea, agenteei matxete batekin mehatxatu ostean.
Aturri ibaiak gainezka egin du Baionan
Aturri ibaiak gainezka egin du ostegun honetan Baionan. Azken egunetan pilatu den euriak eta itsasgorak bat egin dutenean, goizeko zein arratsaldeko seiak bueltan, ibaia bere bidetik irten da. Goizean urak eragin dituen eragozpenak ikusita, arratsalderako Baionako Herriko Etxeak zentzuz jokatzeko eta ibai ingurura ez hurbiltzeko deia egin badu ere, azkenean ez da eragozpen nabarmenik egon.
Zabaldu dute Zumaia eta Getaria arteko errepidea, olatu handiengatik itxita egon ostean
Itsasgora izan den unean egon da itxita, Pedro denboraleak eragin dituen olatu handiengatik. Ostiral goizeko itsasgoraren garaian ere, 05:00etatik 07:00etara, 4 metro inguruko olatuek joko dutela itsas-bazterra espero da.
Barne ministerioak polizia-babesa jarri dio Espainiako Poliziaren buruaren sexu erasoak salatu dituen emakumeari
Kereila jarri zuen egun berean, hau da, asteartean bertan, bere izen-abizenak zabaldu zituzten WhatsAppeko hainbat polizia taldetan, bere abokatuak deitoratu duenez. Horrek antsietatea areagotu dio, eta oso ahul dago.