Bilboko kaleek historian lehenengoz Harrotasuna ospatzeko karrozen desfilea hartuko dute, ekainaren 21ean

Dena prest dago Bizkaian urteko ekitaldirik koloretsuena hartzeko. Bilbao Bizkaia HARROk ortzadarra zabalduko du ekainaren 13tik 26ra, musikaz betetako programa koloretsu eta inklusibo batekin. Aurtengo Bizkaiko LGTBIQ+ harrotasunaren edizioa Derion, Getxon, Santurtzin, Sodupen, Gueñesen eta Bilbon ospatuko da.

Asteazken honetan aurkeztu dute antolatzaileek egitaraua, eta, azaldu dutenez, aurtengo berrikuntzetako bat da estreinakoz egingo dela Harrotasunaren Martxa, Bilbo erdigunean, ekainaren 21ean. LGTBI+ kolektiboaren eskubideen aldeko hitzordu irekia, parte-hartzailea eta aldarrikapenez beteta izango da, antolatzaileen hitzetan. 18:00etan abiatuko da, Jesusen Bihotzetik, Areatzaraino. Karrozak, zuzeneko musika eta giro koloretsua ez dira faltako.

10 urtean zehar Bilboko Itsasadarrean egin da desfilea, baina, aurten kalera egingo du jauzi, "gizartearen presentzia LGBTI+ eskubideen defentsan indartzeko".

Bestelako proposamen berriak ere barne hartzen ditu aurtengo egitarauak: ekainaren 15ean El Balcon de la Lolan (Bailen kalea) egingo den udako zinema, ekainaren 19an euskarari eta euskal kulturari zuzendutako programazio berezia, Lova Lois, BEÑAT eta Asier Bilbaorekin, eta ekainaren 21ean Areatzan ospatuko den patata tortilla lehiaketa gastronomikoa, besteak beste.

Musikak ere hartuko ditu kaleak, egitarau zabal batekin: nabarmentzekoa da Jorge Gonzalez Benidorm Fest 2024ko finalistak emanaldia eskainiko duela. Bertako artistak ere ez dira faltako, tartean Lova Lois, Asier Bilbao, Tolin, Sin trampa ni autotune, eta Estatu mailakoei dagokionez, Nawi, Elliot Vell eta Simétrica ikusiko ditugu Bilbao Bizkaia HARROko agertokietan, bai eta zenbait DJ ezagun ere: Ibai Sanchez, Estrella Electrica DJ, Dennis Moore eta Astra Bomb. 

Txikienek ere izango dute hainbat jardueraz gozatzeko parada, eta LBTI+ emakumeek beren programazio propioa izango dute HARROladies ekimenaren bidez, aurten lehenengoz. Adibidez, ekainaren 14an Santurtzin Agurtza Itsasontzi Museora bisita gidatua izango dute eta ekainaren 20an Bilbon Isabel Rivera eta Merce Copadoren "Body shaming? Mi coño" bakarrizketa.