Albiste izango dira: Boiseko Jaialdia, 9 hilabete bete dira goialdeko borraska gertatu zenetik eta Musika Hamabostaldia
Gaurkoan albiste izango direnen laburpena, bi hitzetan.
Jaialdi 2025. EITB
Honako gai hauek hartuko dituzte gaur, 2025eko uztailaren 29an, hedabideetako lerroburu nagusiak:
- Boiseko Jaialdia: 10 urteren ondoren, atzera berriz euskal kulturaren agertoki bihurtuko da Boise (Idaho, AEB). 1987an jaio zen Jaialdi ekimena, eta, aurtengoa zortzigarren edizioa izango da, uztailaren 29tik abuztuaren 3ra egingo dena. 2020koa bertan behera geratu zen, covidaren pandemia zela eta.
- Valentziako goialdeko borraskak 9 hilabete: 9 hilabete bete dira Valentzia astindu zuen goialdeko borraskak 228 hildako eragin zituenetik. Testuinguru horretan, Carlos Mazon Generalitateko presidentearen aurkako manifestazioa egingo dute Catarrojan, horrek tragediaren inguruan egindako kudeaketa salatzeko.
- Donostiako Musika Hamabostaldia: Donostiako Musika Hamabostaldiaren 86. edizioak irekiera ekitaldia aurkeztuko du. Aurten, abuztuaren 1etik 29ra egingo da.
Gizarteari buruzko albiste gehiago
78 urteko emakume baten hilketa indarkeria matxista gisa ikertzen ari dira Nafarroan
Ikerketako iturriek jakinarazi dutenez, biktimaren senarrak eman du emaztearen heriotzaren berri. Gizona atxilotu dute.
Francis Diez pregoilaria eta Olatz Agirre txupinera, Aste Nagusirako prest
Pregoilariak, Francis Diezek, Doctor Deseo musika taldeko abeslariak, adierazi duenez, "erantzukizuna hartzeko unea zen", eta "gozamena eta betebeharra" bateratzen saiatuko da, "izarra" alde batera utzi eta jaietan jendearen esanetara egoteko. Bestalde, Olatz Agirre txupinerak, Txori Barroteko konpartsakideak, "Bilboko eta inguruko herritarrei, merkatariei eta langileei" gonbitea luzatu die, txupinazoa bota ondoren, jaiez goza dezaten eta parte har dezaten, "pertsona guztientzako lekua dagoelako". "Txori Barrotekoa naiz, baina aurten ez naiz beltzez eta zuriz jantziko, gorriz eta zuriz baizik, konpartsa guztiak eta herri osoa ordezkatzeko", nabarmendu du.
Epaiaren zain gelditu da Beloradoko moja ohien aurkako epaiketa
Bi aldeei entzun ondoren, Briviescako epaileak erlijioso ohiak monasteriotik ateratzeari buruz erabaki beharko du. Kaleratzea atzeratu egin daiteke, epailearen erabakiaren aurka errekurtsoa jar daitekelako. Moja ohiek adierazi dute, kaleratzen badituzte, "komunitatean" erabakiko dutela zer egin, "eutsi ala borondatez alde egin".
Gizarte-langile bat hil dute Pontevedran, adineko bikote bat artatzen ari zela
Lehen ikerketen arabera, adineko senar-emazte batzuen etxebizitzan zegoela, gizonak erreminta batekin kolpatu eta hil egin zuen.
Diaspora, Mexikon
Amerikan 71 milioi herritarrek dute euskal abizena. Hurrengo egunetan, euskal migrazioaren garai eta puntu estrategikoak aztertuko ditugu, Mikel Reparazen eskutik. Gaur, Mexikon izan gara.
Iñaki Williams: "Ultraeskuina modan dagoela dirudien honetan, ahotsa dugunok lanean, erantzuten eta hesiak botatzen jarraituko dugu"
Iñaki Williamsek, denboraldi honetan Athleticen historiako lehen kapitain beltza izango denak, prentsaurrekoan azpimarratu duenez, futbolak ematen dien oihartzunak aukera ematen die bizimodu hobe baten bila datozen pertsonek "hemen" egiten dutena azaltzeko.
Goialdeko depresiotik bederatzi hilabetera, Mazonek tragedia nola kudeatu zuen salatzeko manifestazioa deitu dute
Generalitateko presidentearen dimisioa eskatzeko egingo da, hilero-hilero egin duten moduan. Oraingoan, baina, ez da Valentziako hiriburuan egingo, Catarrojan egingo da, hain zuzen.
20 auto kiskali dira Bilboko Zamakola kaleko garaje batean izan den sutean
Sua 00:35 aldera piztu da, bi solairuko garaje batzuetan aparkatuta zegoen auto batean. Gizonezko bat eta haur bat zauritu dira, kea arnastuta.
Karabela portugesek ustekabean harrapatu dituzte Bizkaiko bainulariak
Isuntzan (Lekeitio) bandera gorria jarri eta bainua debekatu behar izan dute. Muskizen, Getxon, Sopelan eta Ibarrangelun ere abisuak eman dituzte.