Hiru adingaberi sexu-erasoak egin zizkien masajistari 26 urteko kartzela-zigorra ezarri diote

26 urteko espetxe-zigorra ezarri dio Gipuzkoako auzitegiak Donostian hiru adin-txikikori (13 eta 15 urte artean zituztenean) sexu-erasoak egiteagatik 2021ean atxilotutako masajistari eta espetxera bidali du dagoeneko orain arte behin-behinean aske zegoen gizonezkoa. 

Era berean, Auzitegiak ebatzitako beste neurri batzuen artean, espetxe-zigorra bete ostean hasiko den 17 urteko zaintzapeko askatasun zigorra ezarri dio akusatuari eta orotara 40.000 euro ordaindu beharko dizkie hiru bktimei. 

Asteazken honetan audientzia publikoa egin da sententzia irakurtzeko. Gipuzkoako Auzitegiko Lehen Sekzioak 16 urtetik beherakoei egindako hiru sexu-erasoen egiletzat jo du akusatua, horietako baten kasuan modu jarraituan -denboran zehar luzatu zen jazarpenak-, eta bi kasutan benetako konkurtsoan, eta haurren sexu-ziberjazarpeneko delituen egile ere jo du. 

Ebazpenean frogatutzat jotako gertakariek jasotzen dutenez, akusatuak masaje zentro bat zuen Donostian, eta hiru adingabeekin harremanetan jarri zen. Gertakarien unean (2021), 16 urte baino gutxiago zituzten, eta semearen eta beraren bikotekidearen alabaren lagunak ziren, eta masajeak egitea eskaini zien tentsioa eta estresa arintzeko.

Hainbat telefono-aplikazioren bidez haiekin mezuak trukatu ondoren, “pixkanaka nesken konfiantza irabazten joan zen”, harik eta adingabeek masajea ematea onartu zuten arte, eta akusatuak, “tentsioa eta estresa arintzearen” aitzakia horretatik abiatua, sexu-erasoak egiten zizkien.

Gipuzkoako Auzitegiak hiru biktimen deklarazioak balioetsi ditu, “iraunkorrak” izan baitira denboran zehar, kausaren hasieratik “bertsio bera” izan baitute, eta salbuetsita egon baitira “sinesgaiztasun subjektiboaren kausa gisa jardun lezakeen edozein aldarte okertutik”.

“Hiru kaltetuek epaiketan egindako deklarazioak argiak, irmoak eta zalantzarik gabekoak izan dira, eta, gainera, guztiz bat etorri dira akusatuaren jokabide eta jokamoldeei dagokionez”, dio epaimahaiak, eta bere kontakizunek “berrespen garrantzitsuak” izan dituztela ere zehaztu du.

Auzitegiak 14 urteko kartzela zigorra ezarri dio 16 urtetik beherako adingabeari egindako bi sexu-eraso delituengatik (zazpi urte biktima bakoitzeko), 10 urtekoa 16 urtetik beherakoari egindako sexu-eraso jarraituagatik eta bi urtekoa haurren sexu-ziberjazarpenagatik.

Espetxe-zigorrez gain, Gipuzkoako Auzitegiak 17 urteko zaintzapeko askatasuna ezarri dio akusatuari, kartzela-zigorra bete ondoren betearaztekoa, eta 40.000 euroko kalte-ordaina biktimentzat (20.000 euro biktimetako bati eta 10.000 euro beste bietako bakoitzari), besteak beste.

Epaiketa joan den irailean egin zen. Fiskaltzak 45 urtetik gorako kartzela-zigorra eskatzen zuen; defentsak, berriz, absoluzioa eskatu zuen eta 160 000 euroko kalte-ordaina eskaini zien biktimei.