Elizako sexu-erasoen biktimei erreparazioa bermatuko dien batzorde misto bat eratuko duela iragarri du Bolaños ministroak

Felix Bolaños Presidentzia, Justizia eta Gorteekiko Harremanetarako ministroak iragarri du organo misto bat sortuko dela Eliza Katolikoaren eremuko sexu-abusuen biktimei erreparazioa emateko, batez ere bide judizialera jotzea ezinezkoa den kasuetan. Astearte arratsaldean 22 biktima-elkarteetako ordezkariekin egin duen bileran, tartean, Nafarroakoarekin, onartu du Elizak abian jarri zuen Abusuen Biktimei Erreparazio Integrala Emateko Plana (PRIVA) ez dela "irtenbidea".

Moncloan egindako bileran, Gobernua Eliza katolikoarekin izaten ari den elkarrizketak aztertu dituzte, baita Gobernuak Herriaren Defendatzailearen gomendioetan oinarrituta bultzatutako erreparazio- eta aitorpen-planaren egoera ere. Ministerioko iturriek adierazi dutenez, "konfiantza eta ulermen giroan" igaro da. Bestalde, biktimak "nahikoa pozik" agertu dira irteeran.

Biktimek ministroari jakinarazi diotenez, PRIVA planarekin "ez dago ez erreparaziorik ez aitortzarik". Gainera, azaldu dute Eliza biktimetako asko "beldurtzen" saiatzen dabilela. Juan Cuatrecasas Infancias Robadas elkartearen bozeramaileak azaldu duenez, plan horrekin "39 biktimari baino ez zaizkie kalte-ordainak emango, kopuru irrigarriekin, gainera". 

Cuatrecasasen esanetan, Gobernuak argi adierazi du konpromisoa duela lehenbailehen organo misto bat martxan jartzeko. Elizak eta Estatuak osatutako batzorde bat izango da, biktimen parte-hartzea izango duena eta Elizak erreparazioak emango dituela ziurtatuko dituena. Bolañosek aurreratu die "Elizak parte hartu dezan saiatzen" ari dela.

Elkarteek espero dute organo horrek benetan lortuko duela ordaina, eta ez soilik ordain ekonomikoa. Askok salaketa jarri zuten momentuan babesa behar izan dutela diote, baita eskola- eta lan-bazterkeriaren aurka borrokatzen laguntzea ere.