Bizkaitarrak pozik daude oro har euren bizi-egoerarekin, baina jakitun dira oraingo eta etorkizuneko arazoez

Iritzi publikoari buruzko 2025eko inkesta argitaratu du gaur Bizkaiko Foru Aldundiak, gai sozial, ekonomiko eta politikoei buruz 18 urtez gorako 3.000 pertsonari egindako galdeketetan oinarritua. 

Inkesta horren arabera, bizkaitarrek, oro har, nahiko edo oso ondo bizi direla diote, izan ere 10etik 7,6ko puntuazioa eman diote euren bizimoduari. Orainaldiaz baikor diren arren, etorkizunera begira, 5-10 urteko epean, bizkaitarren egoera orokorra txarragoa edo askoz txarragoa izango dela uste dute hamarretik lauk, nahiz eta nork bere etorkizunari begiratuta berdintsu jarraitzea espero duten gehienek. 18 eta 34 urte bitartekoak dira baikorrenak, 10 urtera euren egoera pertsonala hobea edo askoz hobea izateko itxaropena adierazi baitute.

Lurraldeak gaur egun dituen arazo nagusiak oso argi dituzte bizkaitarrek: Etxebizitza (% 61), Enplegua (% 44), delinkuentzia eta herritarren Segurtasuna (% 33), eta Osasuna (%23). 5-10 urteko epera immigrazioa ere arazo nagusien artean kokatu dute galdekatutakoen % 12k inguru.

Egoera ekonomikoari dagokionez, bizkaitarren % 47k uste dute nahiko ona dela. % 40k, berriz, diote ez dela ez ona ez txarra. Egoera ekonomikoak izango duen bilakaeraz, ezkor dira hamarretik hiru.

Enpleguari dagokionez, % 44ren ustez, egoera ez da ona ez txarra ere, % 37ren ustez nahiko ona da, eta % 13aren aburuz, berriz, enpleguaren egoera txarra edo oso txarra da. Etorkizunean, 10 urteko epean, enpleguak okerrera egingo dela uste dute hamarretik lauk.

Arlo politikoaz

Egoera politikoaz eta arlo politikoan egon daitezkeen aldaketez galdetuta, Bizkaian hamarretik bostek ez dute aldaketarik espero, edo, behintzat, aldaketa handirik ez dute aurreikusten. Gainera, aldaketak izatekotan, parekatuta daude aldaketa horiek positiboak izango direla uste dutenen eta negatiboak izango direla diotenen kopuruak, % 37 inguru bi kasuetan ere.

Politikarekiko interes falta agerian geratu da soziometro honetan, izan ere, herritarren % 54k adierazi dute interes gutxi dutela edo batere ez dutela; adin-tarte baxuenetan, batez ere.

Hala ere, Bizkaiko eta EAEko egoera politikoa ontzat jotzen dute herritarren % 70ek baino gehiagok; Estatukoaz duten iritziaz urrun, izan ere, Espainiako egoera txarra edo oso txarra dela diote galdekatutakoen % 79k.

Hamar bizkaitarretik lauk uste dute Foru Aldundiaren kudeaketa nahiko ona dela, eta hamarretik zortzi fio dira haren jardunaz, neurri handi zein txikian. 

Ahaldun Nagusiaren balorazioaz galdetuta, Elixabete Etxanoberen lana eta kudeaketa nahiko ona dela uste dutenak % 28 dira. Ez ondo ez txarto erantzun dutenen kopuru bera, alegia. Dena den, legealdia amaitzeko urtebete falta denean, bizkaitarren erdiak baino gehiagok ez dute Ahaldun Nagusia ezagutzen.

EAJ eta EH Bildu dira gainditzeko moduko nota lortu duten duten bakarrak, hamarretik 5,7 eta 5,3ko balorazioekin, hurrenez hurren. 4,7ko nota jaso du PSE-EEk eta 4,2koa Elkarrekin Podemosek. Alderdi Popularrak jaso du balorazio okerrena, 2,5ekoa.