Tasa turistikoa 2027ko urtarrilaren 1etik aurrera ezarriko da Euskadin

Datorren urteko urtarrilaren 1etik aurrera hasiko dira kobratzen tasa turistikoa Euskadiko establezimendu turistikoetan. Gipuzkoako Foru Aldundiak astearte honetan onartu du zerga berria arautzen duen Foru Arauaren proiektua, eta azaldu du datorren urtean hasiko dela aplikatzen. Hasiera-data hori Bizkaiko eta Arabako foru aldundiekin adostu da.

Gipuzkoaren kasuan, proiektuak jasotzen duenez, zerga berria tokiko tributua izango da, eta ostatu turistikoetan egiten diren egonaldiak zergapetuko ditu; besteak beste, hotelak, pentsioak, apartamentuak, kanpinak, landa-etxeak, aterpetxeak, etxebizitza turistikoak eta baita eskalan dauden gurutzaldiak ere.

Gehienez bost gau
Bisitariek ordainduko dute zerga, kudeaketa establezimenduen esku egongo da eta bilketa udalek egingo dute. Zergaren oinarria gau jarraituen kopuruaren arabera kalkulatuko da, pertsona bakoitzeko gehienez bost gau kontuan hartuta.

Ordainduko den kuota, halaber, ostatu motaren araberakoa izango da, eta establezimenduaren kategoriaren araberako tarifak aplikatuko dira. Zergaren zenbatekoa 0,75 eta 5 euro artekoa izango da pertsonako, gau bakoitzeko. 750 plaza baino gehiago dituzten udalerriek errekargu gehigarri bat ezarri ahal izango dute, eta pertsona eta gau bakoitzeko 7,50 eurora igo ahal izango dute.

Nahitaez aplikatzekoa
Zerga derrigor aplikatu beharko da. Zerga ez aplikatzeko aukera izango duten udalerri bakarrak 25 plaza edo gutxiago dituztenak izango dira. Bildutako diru guztia udalerrietako zerbitzuak hobetzeko erabili beharko da.

Proiektuak salbuespenen zerrenda zabala jasotzen du. Salbuetsita daude 18 urtetik beherakoak, % 65eko edo hortik gorako desgaitasuna duten pertsonak zein mendekotasun-egoeran daudenak, baita ikasketengatik eta osasun-arrazoiengatik bidaiatzen dutenak eta programa sozial publikoetan parte hartzen dutenak ere. Halaber, ezinbesteko arrazoiengatik egindako egonaldiak ere kanpo geratuko dira.

Halaber, udalek zerga egokitu ahal izango dute ordenantza fiskalen bidez: % 100erainoko hobariak ezarri ahal izango dituzte ostatu-ahalmen txikia duten udalerrietan, eta % 50erainoko gainkargak turismo-presio handiagoa dutenetan.

Bestalde, sektorearen eta udalerrien alegazioen ondorioz, aldundiek hainbat puntu adostu dituzte. Indarrean sartzeko data bera adostu da, eta nekazaritza-turismoetarako tarte espezifiko bat sortu da; horrek zergaren tasarik baxuena izango du, pertsonako 0,5 eta 1,25 euro artekoa.

Gainera, arauak argitaratu aurretik egindako erreserbak (hau da, 2026ko otsailaren 5a baino lehen egindakoak) salbuetsita egongo dira, sektorean gatazka juridikoak murrizteko helburuarekin.

Bizkaiaren kasuan, Foru Arauaren proiektua Gobernu Kontseiluak apirilean onartuko du. Ondoren, testua Batzar Nagusietara bidaliko da izapidetzeko eta behin betiko onartzeko; prozesu hori ekainean amaitzea aurreikusten da. Araban, berriz, hilabete honetan onartuko da.