Mugikorrak alboratu eta familiaz gozatzeko gonbita, apirilaren 18an, EAEko hiriburuetan

Mugikorrik Gabeko Eguna Familian antolatu du, aurrenekoz, Eusko Jaurlaritzak.  Datorren apirilaren 18an, Bilbon, Donostian eta Gasteizen kokatutako hiru gunetan gauzatuko da egitasmoa eta zabalik izango dira parte hartu nahi duen familia ororentzat, izan seme-alabadunak, izan umerik gabekoak.

Helburuak garbiak eta zehatzak dira: familien ongizate emozionala eta harreman-ongizatea sustatzea, mugikorraren erabilerak eguneroko bizikidetzan duen eraginaz jabetzea eta orientazio digital positiboa sustatzea.  

Nerea Melgosa sailburuak egitasmoa aurkeztu duenean nabarmendu duenez "mundu hiper-konektatu batean, mugikorra gure eguneroko bizitzaren parte da. Informazioa ematen digu, konektatu egiten gaitu eta zeregin asko errazten dizkigu. Baina, batzuetan, konturatu gabe, hurbilen ditugunengandik urruntzen gaitu”.

Hain zuzen ere, mugikorren erabilerak herritarrengan eta familiengan duten eraginaz hausnartzeko gonbidapen gisa bultzatu dute Mugikorrik Gabe igarotzeko Eguna Familian, “ez debeku gisa”. “Kontzientzia hartzeko, ongizate emozionala zaintzeko eta denbora partekatuaren balioa berreskuratzeko keinu txiki bat da" azaldu du, Melgosak.

Hiru gune, hamaika konpromiso

Helburu horiek lortzen laguntzeko, apirilaren 18an, gune bana izango dira zabalik Bilbon, Donostian eta Gasteizen, 11:00etatik 19:00etara. Doako jarduera izango da.

Hala, aurrez familia bakoitzarekin adostutako denbora tarte batez mugikorrak zaintzapean izango diren poltsetan sartuko dituzte parte-hartzaileek eta, pantailarik aurrean izan gabe, solaserako, jolaserako, elkarri entzuteko eta familian gozatzeko aukera izango dute, ohitura digitalei buruz hausnartzeko, bide batez.

Hala nahi duten familiek, gainera, teknologiaren erabilera kontzienteagoa egiteko konpromisoak adierazi ahal izango dituzte, familiek beraiek zehaztutako Familia Konpromisoa sinatuta. Proposamen gisa emango zaien dokumentu batean markatu ahal izango dituzte zein konpromiso hartzeko prest dauden familiako kideak. Besteak beste, mugikorra erabiltzeari baino familiakoen arteko uneei lehentasuna ematea; teknologiaren erabilera arduratsuaren eredu izatea (bereziki pertsona helduak); familian pantailarik gabeko jarduerak sustatzea; eta mugikorraren erabilerari buruzko familia-akordio argiak ezartzea proposatzen dira dokumentu horretan.

Jaurlaritzak zehaztu duenez, langile kualifikatuak egongo dira guneetan, familiei prozesu guztian zehar laguntzeko eta amaieran, sakelako telefonoak gordetzeko kutxa bat emango zaie parte-hartzaileei, gunetik joan arte kide guztien mugikorrak bertan uzteko eta deskonexio digitalean laguntzeko.