Matxura baten ondorioz, bi gaixo zeramatzan hegazkin medikalizatuak geldialdia egin behar izan du Kanaria Handian

Tedros Adhanom Ghebreyesus Munduko Osasun Erakundearen (MOE) zuzendari nagusiak jakinarazi duenez, hantabirusa izan zezaketen hiru lagunak Hondius gurutzaontzitik atera dituzte, eta Herbehereetara doaz, han arreta medikoa jasotzeko.

Hala ere, Cabo Verdetik Herbehereetara zihoan anbulantzia-hegazkinetako batek geldialdi bat egin behar izan du Kanaria Handian, isolamendu-burbuila hautsi baitzaie.

Kanarietako Gobernuaren Ordezkaritzak zehaztu duenez, hori da hegazkina Kanaria Handiko aireportura bideratzeko arrazoia; izan ere, hasiera batean, asmoa zen Marrakexera joatea, han erregaia hartzeko, Amsterdamera joan aurretik.

Gobernuaren Ordezkaritzak ziurtatu du hegazkinari baldintza bat jarri zitzaiola Kanaria Handian lurreratzeko: hegazkinetik inor ez zela ez atera ez sartu behar. Baldintza hori errespetatu egin dela ziurtatu du.

Hegazkina 11:00etan abiatu da Praia nazioarteko aireportutik, Marrakexen erregaia kargatzeko asmoz, 16:00ak aldera, Amsterdamera joateko. Bertara 17:00etan iristea aurreikusita zuen, Herbehereetako orduan.

Hala ere, 16:00ak baino lehentxeago, Kanaria Handira bideratu dute. Bere plana 17:40an Herbehereetara abiatzea zen. Hala ere, EFEk egiaztatu du 18:15ean (uharteetako ordua) Kanaria Handiko aireportuan jarraitzen zuela.

Ebakuazioak Herbereetara

Tedrosek X sare sozialean adierazi duenez, ebakuazioa eta lekualdatzea MOEk, ontzi-enpresak eta Cabo Verdeko, Erresuma Batuko, Espainiako eta Herbehereetako agintariek koordinatu dute.

Halaber, Tedrosek azpimarratu du monitorizazioa eta jarraipena egiten hasi direla (bidaiariak eta lehorreratu direnak) nola dauden kontrolatzeko, operadoreekin eta osasun-agintari nazionalekin lankidetzan. Horren harira, osasun publikorako arrisku orokorrak "txikia izaten jarraitzen" duela azpimarratu du.

Lehen hegazkina iritsi da Schipholeko aireportura, Amsterdametik gertu, Euskal Herrian 19:00ak zirenean. Bertan zihoan pazientea anbulantzian eraman dute, NOS Herbehereetako telebista kateak jakinarazi duenez.

Bigarren hegazkina laster iritsiko da aerodromora, izan ere, Kanaria Handian gelditu behar izan du, osasun-ekipamenduan arazo tekniko bat izan duelako.

Herbehereetara hegazkinez eraman dituzten hiru bidaiariak 41 urteko herbeheretar bat, 56 urteko britainiar bat eta 65 urteko alemaniar bat dira, Herbehereetako Atzerri Ministerioaren eta gurutzaontziaren operadorearen arabera.

Hiruretatik bik sintoma larriak dituzte, eta batek ez du sintomarik, baina susmagarria da maiatzaren 2an hildako bidaiari batekin kontaktua izan ondoren kutsatu izan daitekeelako, Oceanwide Expeditions enpresak zehaztu duenez.

Ebakuazioa eginda, itsasontzian ez da sintomak dituen inor geratzen, gainerako 146 bidaiarien artean. Hala ere, ontziaren operadoreak eta Herbehereetako osasun-agintariek gurutzaontziko osasun-arreta indartzea erabaki dute, gaur bertan gaixotasun infekziosoetako bi espezialista eramanda.

Datorren larunbatean MV Hondius ontzia Tenerifeko Granadilla de Abona portuan amarratuko dutela aurreikusi dute. Bertatik, atzerriko bidaiariak beren herrialdeetara eramango dituzte, eta 14 espainiarrak Gomez Ulla ospitalera (Madril) eramango dituzte, berrogeialdia egiteko.