12 adingabe eraman dituzte Loiuko aireportutik ospitalera, gastroenteritis zantzuekin

Lanzarotera zihoan hegaldi baten zain zeuden 12 adingabe artatu ditu Osakidetzak larunbat arratsaldean. Anbulantzian eraman dituzte Bilboko aireportutik Gurutzetako eta Basurtuko unibertsitate-ospitaleetara, horietako batzuk okadak eta zorabio-sentsazioa izan ondoren. Gastroenteritisarekin bateragarriak diren sintoma arinak izan dituzte.

Osasun Sailak jakitera eman duenez, adin txikikoek 11 eta 12 urte bitartean dituzte, eta aurretik antolatutako bidaia bateko kideak ziren. Hegazkinera igo aurreko itxaronaldian, horietako batzuk ondoezik sentitzen hasi dira, eta, ondorioz, Osakidetzaren larrialdietako anbulantzia zerbitzuak aktibatu dituzte.

Anbulantziak aireportura bertara joan, eta osasun-taldeek lehen balorazioa egin dute han bertan, aireportuan antolatutako asistentzia-operatiboan.

Ondoren, prebentzioz, 12 adingabe Gurutzetako eta Basurtuko ospitaleetara eraman dituzte, ebaluazio osoagoa egiteko.

Bi zentro horietan artatu dituzten paziente gazteek gastroenteritisarekin bateragarriak diren sintomatologia arinak zituzten baina ez diete larritasunik hauteman, eta ordu gutxian senda-agiria eman diete guztiei.

Dirudienez, adingabeek elikadura-intoxikazioa izan dute Asturiasen egindako egonaldian. Taldeari laguntzen zioten monitoreek ez dute sintomarik izan.

Egoera normaltasun osoz kudeatu dela azpimarratu nahi izan du Osakidetzak, eta ez dela aparteko zerbitzurik aktibatu behar izan.

Osasun Sailak "anbulantzien eta osasun arloko langileen esku-hartze azkarra eta eraginkorra" goraipatu du, "aireportuan bertan eta ospitaletara bidean egin duten lana funtsezkoa izan baita arreta arin eta segurua bermatzeko, bai eta Gurutzetako eta Basurtuko ospitaleetako larrialdi-zerbitzuen koordinazioa eta profesionaltasuna bermatzeko ere".