Almeriako sutean hildako sei pertsona identikatu dituzte

Joan den ostegunean Los Gallardosen (Almeria) piztutako baso sutearen bilakaeraren eraginez, larrialdia "zero" egoerara jaitsi dute, mailarik baxuenera, igandean sua egonkortu ostean.

Horixe iragarri dute Juanma Moreno Andaluziako presidenteak eta Pedro Sanchez Espainiako Gobernuko presidenteak Turren antolatutako aginte-postuan egindako agerraldian.

Andaluziako presidenteak goraipatu egin du egunotan administrazio guztien eta larrialdi zerbitzuen arteko koordinazioa. Izan ere, Infoca, Larrialdietarako Unitate Militarra, suhiltzaileak eta segurtasun indarrak aritu dira sua itzaltzeko lanetan.

Dena dela, eta suteak bilakaera ona izan duen arren, Morenok atsekabea agertu du 13 pertsona hil direlako. Azken biktima 93 urteko emakume britainiar bat izan zen, igande honetan zaurien ondorioz hil zena. Lau pertsona oso larri daude Sevillako Virgen del Rocio Ospitaleko Erredura Handien Unitatean.

Morenok ohartarazi duenez, Andaluziak uda "oso gogorra" igaroko du baso suteen arloan. Azaldu duenez, azken hilabeteetako euriteek sortutako landaretza ugariak eta bero bolada goiztiarrek sua hedatzeko agertoki bereziki egokia sortu dute, eta erretako azalera duela urtebete erregistratutakoa baino hiru aldiz handiagoa da jada.

Era berean, Andaluziako presidenteak herritarrei azaldu die klima aldaketak bere erkidegoan duen eragina "oso handia" dela, eta kontzientziazioa eta "sentsibilitatea" eskatu die.

Verako Auzitegiak (Almeria) hartu du bere gain sutearen inguruko ikerketa, eta gaur jakinarazi dutenez, sei gorpu identifikatzea lortu dute: espainiar bat, Erresuma Batuko bi herritar eta Frantziako, Belgikako eta AEBtako beste bana daude identifikatuen artean.