Lukas Aguirreren hilketagatik zigor handiena duenak helegitea aurkeztu du, homizidio delitu gisa epaitu dadin

Lukas Agirre hiltzeagatik 20 urteko zigorra jaso zuen gizonezkoaren defentsak helegitea aurkeztu du Euskal Autonomia Erkidegoko Auzitegi Nagusian (EAEAN), delituaren kategoria aldatu eta hilketatik homizidiora jaits dezala eskatzeko. Donostiako erdiguneko diskoteka baten kanpoaldean gertatu zen, 2022ko abenduaren 25eko goizaldean.

Eva Cestafe Lete abokatuak zigorra ahalik eta gehien murriztea eskatu du. Horretarako, erasoa gertatu zenean bere bezeroa drogaz eta alkoholez leporaino zegoela (politoxikomania koadro batekin) argudiatu du.

Zigorrak

Joan den ekainean, herri-epaimahaiak errudun jo zituen hiru akusatuak —bi gizon eta emakume bat—. Epaiak 20 urteko kartzela-zigorra ezarri zion egile materialari (orain EAEANra jo duena), bederatzi urte eta erdikoa bigarrenari, laguntzaile gisa jardun zuelako, eta urtebete eta bi hilabetekoa emakumeari, estaltze delitu batengatik.

Ebazpen horretan, epaimahaiak drogak kontsumitzeagatiko aringarri arrunta aplikatu zien akusatu nagusiari eta emakumeari. Bigarren gizonari, berriz, zigorra gehiago arindu zitzaion, epaiak frogatutzat jo baitzuen buruko nahasmendu bi zituela eta estupefazienteak kontsitu zituela.

Defentsak ukatu egin du zigortuak azpikeriaz jokatu izana

Helegitearen arabera, epaiak akats bat egin zen krimena hilketa gisa sailkatzean. Defentsaren arabera, ez zen azpikeriarik egon, Lukas Agirrerren heriotza "bi talderen arteko borroka baten testuinguruan" gertatu zelako. Borroka horren ondorioz biktima erne zegoela dio abokatuak; ondorioz, erasoa ez zela ezustekoa izan babesten du, eta biktimak bere burua defendatzeko aukera izan zuela.

Era berean, idazkiak neurrigabetzat jo du akusatua drogaren menpe egon izana aringarri arrunt gisa soilik hartu izana. Defentsak berriz adierazi du sustantzia ugari kontsumitzeagatik (politoxikomania) muturreko koadro bat zuela, eta horrek zigorra askoz gehiago murriztu beharko lukeela.

Gatazkaren jatorria

Ekainean, bi gazte taldeek diskotekaren kanpoaldean 2022ko abenduaren 25eko goizaldean eztabaida izan zutela frogatu zen. Lehenengo tirabira baten ostean —laguntzaileak labana eman zion egile nagusiari—, akusatuek "ez dakizue nor duzuen aurrean" esanez mehatxatu zituzten gazteak.

Handik gutxira, plazaren beste aldean bigarren borroka bat hasi zen, eta akusatu nagusia lurrera erori zen, ukabilkada baten ondorioz. Une horretan, altxatu eta bi labankada eman zizkion Agirreri "bat-batean eta ezustean", eta ondoren korrika ihes egin eta arma edukiontzi batera bota zuen.