Abdula eta Gani, aurrez aurre, hauteskundeen bigarren itzulian
Abdula Abdula eta Ashraf Gani aurrez aurre izango dira Afganistango hauteskundeen bigarren itzulian, lehenengoan ez batak eta ez besteak botoen % 50a ez gainditu ostean.
Abdulak botoen % 44,9 lortu zuen, eta Ganik, % 31,5. Hori dela eta, aurrez aurre izango dira datorren ekainaren 7ko bigarren itzulian.
Ahmad Yousef Nuristani Afganistango Hauteskunde Batzordearen zuzendariak azaldu duenez, aurretiko emaitzak dira eta maiatzaren 14an emango dute behin-betiko emaitzen berri. Hortaz, aldaketak egon litezke.
Zalmai Rasulek botoen % 11,5 jaso zuen, eta Abdul Rab Rasul Sayafek, % 7,1. Hortaz, bi hautagaiak hauteskundeetatik kanpo gelditu dira.
Joan den apirilaren 5ean, 6.892.816 pertsonak parte hartu zuten hauteskundeetan, % 64 gizonezkoak eta % 36 emakumezkoak.
Gainera, segurtasun faltagatik edo azpiegituretan izandako arazoengatik, 20.651 hauteslekuetatik 1.130etan ezin izan zituzten ateak ireki.