Venezuela: etenik ez duen emigrazioa

Venezuelarren  emigrazio jendetsua zonalde osoko  arazo bilakatu da jada.  Brasilek mugara errefortzu militarrak bidaltzea erabaki du, eta, Kolonbiak, berriz, nazioartearen laguntza eskatu du.

Ekuador eta Peru  zailtasunak jartzen ari dira venezuelarren sarrerari pasaportea eskatuz, orain arte horren beharrik ez zegoenean.  Herrialde horietako gobernuak  koordinatu nahian dabiltza egunero  milaka  venezuelarren etorreraren aurrean.

Venezuelarren emigrazio hori ez da gauza berria,  kalkulatzen da azken  bi urteetan  milioi eta erdi  venezuelarrek alde egin dutela  haien  herrialdetik;  dena den hori  agerikoagoa da azken asteotan,  Venezuelan  egoera politiko eta ekonomikoak okerrera egin ostean. Maduro presidenteak  iragarri dituen azken  neurriak ez dira  emaitzak ematen ari  eta  emigrazioa  are gehiago handituko da.

Moneta berri bat sartzeak, “bolibar subiraua” deitua,  nahasmena baino ez du sortu,  inflazioak  goranzko bidean segitzen du eta  merkatuan  oinarrizko produktuak falta dira. Maduroren arabera  horrek azalpen  erraza du: horren atzean bere kontrako nazioarteko  konspirazioa dago  eta  venezuelarrak ihesi doaz kanpotik engainatzen ari direlako.