Mutiko bat botoi atomiko batekin

Estatu Batuetan gertatzen ari dena larria da munduko lehen potentzia militar eta ekonomikoaz ari garelako. Munduko nuklear botoirik handiena bere eskuetan duen gizonaz ari gara (berak esana da hori)  eta bere erabakiekin mundu mailako krisi ekonomikoa eragin dezakeena.

Leku guztietan daude borrokak botereagatik eta eztabaidak Gobernu barruan. Edozein herrialde txikiz ari bagina, zerbait dibertigarria ere izan zitekeen… baina  Estatu Batuez ari gara.

Geroz eta ageriago dago Donald Trump presidente oldarkor, kapritxoso, suminkor eta gorrotatzaile bat dela, gaizki informatua gainera, ikasteko interesik ez duena eta kontzentratzeko zailtasunekin…. ikusten duzuen bezala oso profil lasaigarria munduarentzat. Omarosa Manigault bere  aholkulari-ohiaren eta Bob Woodward kazetariaren  liburuek eta The New York Timesen argitaratutako artikulu anonimoak presidentearen gabezien testigantza gehiago eman besterik ez dute egin.

Baina Trumpi guzti hau ez datorkio batere gaizki: bere kontrako konspirazioa dagoenaren ideia astintzeko balio dio eta traidorez inguratuta dagoela esateko. Estatu Batuetako boto-emaileek, ordea, aukera ona izango dute bi hilabete barru, hauteskunde parlamentarioak egiten direnean, nori sinesten dioten erabakitzeko.