West Texas motako petrolio upelak negatiboan kotizatu du bere historian lehen aldiz

Ameriketako Estatu Batuetan (AEB) erreferentzia gisa hartzen den West Texas Intermediate (WTI) petrolio upelaren prezioak negatiboan kotizatu du bere historian lehen aldiz, upelaren prezioa -37,63 dolarreraino jaitsi baita. Horrek aurrekaririk gabeko gainbehera eragin du petrolioaren merkatuan.

Zehazki, koronabirusak eragindako pandemiaren ondorioz sortutako krisiak petrolioaren eskaria nabarmen jaistea eragin du, izan ere, kontsumoak behera egin du eta erreserbako tankeak gordina gordetzeko lekurik gabe geratu dira.

Hain zuzen ere, maiatzean entregatzeko etorkizuneko petrolio kontratuak -1,9 zentabotan kokatu dira upel bakoitzeko, ostiralean 18,27 dolarretan itxi zituzten arren.

AEBko petrolioak ez du inoiz negatiboan kotizatu datuak eskuragarri daudenetik. 1983an, ordea, etorkizuneko kontratuak negoziatzen hasi zirenean, petrolio gordinaren prezioa minimo historikoetara jaitsi zen.

Aldiz, ekainerako prezioa finkatzeko joera egonkorrago agertu da egunean zehar. Upel bakoitzeko jaitsiera % 13 ingurukoa izan da astelehen honetan, 21,78 dolarrekoa.

Astearte honetan, ordea, West Texas Intermediate petrolio upelaren prezioak gora egin du.

Europar Batasunean erreferentzia den petrolioaren kasuan, berriz, Brent upelaren prezioa 25,57 dolar ingurukoa izan da, ostiraleko itxierakoa baino % 8,9 baxuagoa. Aurten, Brent upelak % 64 egin du behera.

Joan den astean, Energiaren Nazioarteko Agentziak (ENA) "2020a petrolioarentzat historiako urterik txarrena" izango dela ziurtatu zuen, eta apirila "hilabete beltza" izango zela iragarri. Gehiegizko eskaintzak petrolioa gordetzeko mundu-mailako gaitasuna kolokan jarriko zuela ohartarazi zuen, eta zenbait aztarnategitako saturazioak ekoizpena gelditzera behartzeko arriskua zegoela.

Era berean, Lurralde Petrolio Esportatzaileen Erakundeak (LPEE) aurreikusi zuen petrolio gordinaren eskaria 20 milioi upel inguru jaitsiko zela apirilean. Horren arabera, urte osoan, eskaria 6,91 milioi upel murriztuko da eguneko.

Brent upelak % 8,90 egin du behera, 25,58 dolarreraino

Koronabirusaren krisiak eta gehiegizko ekoizpenak eragindako zailtasunek kolokan jarri dute Brent petrolio upelaren kotizazioa Londresko merkatuan; izan ere, % 8,90 jaitsi da, 25,58 dolarreraino.

Europan erreferentzia den petrolio gordinak 2,50 dolarreko jaitsiera izan du azken negoziazioarekin alderatuta, aurrekoan 28,08 dolarrekoa izan baitzen.