"Aurrerapausoak" Kieven eta Moskuren arteko lehen bileran

Errusiako eta Ukrainako ordezkaritzek bilera egin dute Pripiaten, Ukraina eta Bielorrusia arteko mugan. Negoziazio horren baitan, Kievek Errusiaren su-etena lortu nahi du, bost eguneko gerraren ostean. Hala ere, batzarra akordiorik gabe bukatu da. Ondorioz, datozen egunetan negoziatzen jarraituko dute bi aldeek.

Leonid Slutski Errusiako ordezkariak jakitera eman duenez, bilerak bost ordu iraun du, eta "hurrengo batzarra datozen egunetan izango da", gaineratu du.

Kieven arabera, negoziazioetan "nolabaiteko aurrerapausoak" eman dira. "Lehentasunezko gaiak mahai gainean jarri dituzte aldeek, eta nolabaiteko aurrerapausoak sumatu dira", esan du Mikhailo Podoliak Ukrainako presidentearen bulegoko aholkulariak Telegram bidez.

Ukrainako ordezkaritza, besteak beste, David Arakhamia Herriaren Zerbitzari buruak, Oleksiy Reznikov Defentsa ministroak, Mikhailo Podoliak Presidentetzaren aholkulariak eta Mikola Tochitski Atzerri ministrordeak osatzen dute. Errusiako ordezkaritza Presidentetzako Administrazioaren, Defentsa Ministerioaren eta Errusiako Federazioaren Kanpo Harremanetarako Ministerioaren ordezkariek osatzen dute, baita Estatuko Dumako ordezkari batek ere.

Arakhamiak berak aldez aurretik adierazi duenez, asteleheneko bileraren helburua Errusiak inbasioa hasi ostean ordezkaritzak dituen "proposamenak entzutea" da, UNIAN Ukrainako albiste-agentziak jaso duenez.

Volodímir Zelenski Ukrainako presidentearen esanetan, bilera onartu du ukrainar bakar batek ere zalantza izpirik izan ez dezan gerra geldiarazten saiatu dela, horretarako aukera egon denean, baina itxaropen handirik ez duela onartu du.

EBn sartzeko eskaera 

Ukraina Europar Batasunean sartzeko eskari ofiziala sinatu du astelehen honetan presidente ukrainarrak.

Nazioari bidalitako mezu batean, Zelenskik astelehen honetan berretsi du garrantzitsua dela Ukraina Europar Batasuneko kide izatea, eta herrialdea batasunean "berehala" sartzeko "prozesu berezi bat" hasteko eskatu dio EBri.

Agintariak prozedura martxan jartzeko eskatu dio Bruselari, eta eskerrak eman dizkio Europari Errusiak lurraldea inbaditu ondoren jasotako babesagatik.

"Gure helburua europar guztiekin batera egotea da, eta, garrantzitsuena, berdintasunean egotea", esan du atxikitzeari dagokionez; Kievek aurretik ere eskatu dizkio EBri norabide horretan aurrerapausoak, Ukrinform albiste-agentziak emandako informazioen arabera.

Erasoa Kharkiven

Anton Geraxenko Ukrainako Barne Ministerioaren aholkulariak salatu duenez, Kharkiven (Errusiako mugatik 35 bat kilometrora dagoen hiria) egindako erasoetan dozenaka pertsona hil eta ehunka zauritu dituzte Errusiako tropek.

"Kharkiv. Auzo baten kontrako gupidarik eta zentzurik gabeko erasoa misilekin! Gorpuak txikituta kaleetan", idatzi du Gerastxenkovek Telegram bidez. Bertako zenbait bideo argitaratu ditu, eta irudi lazgarriak ikus daitezke horietan.

Ukrainako Osasun Ministerioak biktima zibilen azken balantzea eman du astelehen honetan. Behin-behineko hildakoen kopuruak 352koa jarraitzen du izaten, baina zaurituak dagoeneko 2.000 gehiago dira; 2.040, hain zuzen.

Nazio Batuen Erakundeak, ostera, 102 zibil hil eta 300 zauritu direla baieztatu du.

Macronek Putinekin hitz egin du, Zelenskik eskatuta

Emmanuel Macron Frantziako presidenteak Volodimir Zelenski Ukrainako presidentearekin eta Vladimir Putin Errusiako homologoarekin hitz egin du. Erasoetan bizilagunen aurka ez egiteko eta azpiegiturak errespetatzeko konpromisoa hartu du Putinek elkarrizketan.

Eliseok azaldu duenez, Macronek Zelenskik "eskatuta" hitz egin du Putinekin, Ukrainan egoera humanitarioa hobetzeko asmoz.

Putinekin izandako elkarrizketan, "erasoaldia bukatzeko nazioartearen eskakizuna" helarazi dio Macronek, baita "berehala su-etena" abiatzeko eskatu ere.

Errusiak aireko espazioa itxi die 36 herrialderi

Bestalde, Errusiak 36 herrialderi aireko espazioa ixtea erabaki du, tartean Europar Batasuneko estatu guztiei eta Kanadari, Rosaviatsia Aireko Garraio Agentzia Federalak jakitera eman duenez.

Suitzako Gobernuak Europar Batasunarekin bat egin du, eta Errusiaren aurkako zigor ekonomikoak iragarri ditu astelehen honetan. Ignazio Cassis bertako presidenteak azpimarratu duenez, ekintza "bakarra" da.

NBEren Batzar Nagusia

NBEren Segurtasun Kontseiluak premiazko bilera batean onartu du Errusiaren inbasioa NBEren Batzar Nagusian aztertzea, Errusiaren betoagatik Segurtasun Kontseiluan gaitzespen bat onartzea ezinezkoa delako. Egin den bozketa berezi horretan, Segurtasun Kontseiluko bost kide iraunkorrek, tartean Errusiak, ez dute izan beto-eskubidea erabiltzeko aukerarik, eta nahikoak izan dira aldeko bederatzi boto onartzeko.

NBEren Batzar Nagusiaren ezohiko deialdia astelehen honetan egingo da. 193 estatu kideek Errusiak Ukraina inbaditu izana gaitzesteko ebazpena eztabaidatuko dute, orain arte Moskuk betoa jarri arren.

Bestetik, Europar Batasuneko estatuek Ukrainara arma hilgarriak eta munizioa bidaltzea finantzatzeko akordioa adostu dute igandean; 450 milioi euro bideratuko dituzte Ukrainari Errusiaren inbasiotik defendatzen laguntzeko. Laguntza horri 50 milioi euro gehituko zaizkio, material ez-hilgarria bidaltzeko; erregaia edo babesteko materiala, besteak beste.

NBEren Errefuxiatuentzako Agentziak (ACNUR) azaldu duenez, dagoeneko 422.000 herritarrek ihes egin dute Ukrainatik; horietatik 150.000 Poloniara joan dira. Gainera, 100.000 barne-desplazatu omen daude momentuz.