Ukraina Errusiako Armadaren erasoaldi handi baten beldur da, inbasioa hasi zenetik sei hilabete igaro direnean

Ukrainak bere Independentziaren Eguna ospatuko du asteazken honetan, Errusiak herrialde hori inbaditu zuenetik sei hilabete beteko direnean, hain justu ere. Eta egun seinalatu hori erasoaldi militar handi bat egiteko baliatuko duela uste du Kieveko Gobernuak.

"Errusiak ez du inor ezustean harrapatuko egunotan zerbait berezia egiten saiatzen bada. Badakigu nola jokatzen duten. Probokatzaileak dira", adierazi du Volodimir Zelenski presidente ukrainarrak Andrzej Duda Poloniako presidentearekin bildu denean.

Aste honetan, Vladimir Putinen ideologoaren alaba hil dute Moskun, eta Kremlinak Ukrainari egotzi dio atentatu horren ardura. Gertakari horrek eta tropa errusiarrek Krimean egindako sabotajeek bi herrialdeen arteko harremanak gehiago gaiztotu dituzte.

Andrzej Duda Kievera joan da Ukrainaren independentzia babesten duela erakusteko eta Krimeako Plataformak antolatutako foroan hartu du parte, Zelenskirekin batera. Recep Tayyip Erdogan buruzagi turkiarra ere ekitaldi horretan izan da eta Krimea Ukrainaren esku uztea munduko segurtasuna bermatzeko garrantzitsua dela esan du.

Bestalde, Zelenskik ohartarazi du, atzerriko zerbitzu sekretuen arabera, Errusiako Armadak "ekintza krudelago bat" egiteko asmoa duela.    

"Mehatxurik existitzen al da? Bai, mehatxua badago. Mehatxu hori egunerokoa da. Informazio gehiago daukagu? Badakigu lehentasunak zeintzuk diren. Azpiegiturak eta Gobernuaren eraikinak erasotzen dituzte, lehendabiziko egunetik. Errusiak behin eta berriro egiten du hori", azpimarratu du.

Independentzia Eguna, festarik eta ekitaldi jendetsurik gabe

Datozen orduetan erasoak izan daitezkeela eta, Ukrainatik ihes egiteko gomendatu die, enegarrenez, Gobernuak herritarrei.

Inteligentzia militar ukrainarraren esanetan, Putinen "obsesioa" da data seinalatuetan eraso handiak egitea. Hainbat komunikabidek zabaldu dute, iturri estatubatuar ofizialak aipatuta, azpiegitura zibilak eta Gobernuaren eraikinak izan direla tropa errusiarren helburu nagusiak.

Soldadu errusiarrak martxo bukaeran erretiratu ziren Kieveko inguruetatik, baina orain beldur dira ez ote duten Ukrainako hiriburuaren aurkako beste eraso bat abiatuko.

Gauzak horrela, agintariek bertan behera utzi dituzte Independentziaren Eguna ospatzeko ekitaldi guztiak eta agerraldi publikoak egitea galarazita egongo da astebetez. Horrez gain, funtzionarioei telelanean aritzeko agindu diete eta hiriguneetan lan egiten duten beharginen lanaldia murriztu dute.