Altzairuaren eta aluminioaren inportazioei % 25eko muga-zergak ezarri dizkie Trumpek, gaurtik hasita

Gaurtik aurrera, AEBk inportatutako altzairu eta aluminioak % 25eko muga-zergak izango ditu. Horrez gain, asteartetik hasita, Ameriketako Estatu Batuetako (AEB) produktuei ezartzen dizkien muga-zerga berdinak jasoko dituzte bueltan euren produktuak AEBn saldu nahi dituzten herrialdeek.

Aparteko salneurri horiek "denei" ezarriko dizkiela zehaztu du Trumpek. "AEBtik kanpo heltzen zaigun edozein altzairuk % 25eko muga-zerga izango du. Berdin, aluminioarekin. % 15ekoa bientzat", esan du Trumpek Air Force One hegazkinean, Super Bowl ikuskizunera abiatu aurretik.

Txina da, gaur-gaurkoz, munduko altzairu eta aluminioaren ekoizle handiena, eta baliteke, berak ere muga-zergak iragartzea.

Era berean, muga-zerga gehigarriak iragarri ditu AEBko produktuei zergak ezartzen dizkieten herrialdeentzat. "Sinplea da: kobratzen badigute, guk ere kobratuko diegu (...). % 130eko muga-zergak ezartzen badizkigute, eta guk ez dugu ezertxo ere kobratzen; horrek ez du horrela funtzionatzen", azaldu du trukean muga-zergak ezartzearen gainean.

Muga-zergak "herrialde guztiei ia berehala" ezartzearen alde mintzatu da, horrenbestez, Trump.

Otsailaren 1ean Txinari % 10eko muga-zergak ezarriko zizkiola jakinarazi zuen presidente errepublikanoak; Kanadaren eta Mexikoren kontra ere kargak iragarri zituen, baina bi kasu horietan hilabetez atzeratu zuen neurria, mugetan kontrol gehiago ezartzearen truke.

Txinaren muga-zergak ere, indarrean

Ingurumari horretan, gaur sartu dira indarrean Txinak AEBko zenbait produkturi % 10etik % 15era arteko muga-zerga gehigarriak. Trumpek Txinako inportazioei ezarritako kargei erantzunez iragarri zituen zergok Xi Jinpingek.

Gainera, beste bi neurri iragarri zituen Asiako erraldoiak: funtsezko mineralen esportazioaren kontrol zorrotza eta monopolioaren aurkako Googleren kontrako ikerketa bat.

Bi potentzien arteko desadostasunak konpontzeko elkarrizketak abiatuko zituztela zabaldu bazen ere, azkenean ez omen da halakorik egon eta indarrean sartu dira muga-zergak.