Errusiari zerga gehigarriak ezartzeko mehatxua egin du Trumpek, Moskuren erruagatik negoziazioa trabatzen bada

AEBko presidente Donald Trumpek ohartarazi du "oso haserre" eta "oso ernegatuta" dagoela Errusiako presidente Vladimir Putinekin, Ukraniako gerrarekin lotutako su-etena lortzeko negoziazioek hartu duten norabidea ikusita. Hori horrela, Moskuri "bigarren mailako muga-zergak" jartzeko mehatxua egin du, "baldin eta pentsatzen badut elkarrizketak trabatzen ari dela".

"Errusiak eta biok Ukrainako gerraren amaierari bide emango dion akordio bat lortzen ez badugu, eta iruditzen bazait Errusiaren erruagatik izan dela (baliteke horrela ez izatea) muga-zerga gehiago jarriko dizkiot Errusiatik ateratzen den petrolio guztiari", esan dio NBC Newsi.

Suminduta agertu da Trump Putinek ostegunean egindako adierazpenengatik. Volodimir Zelenski ukrainar presidentea NBEk eta AEBk babestutako "aldi baterako" gobernu batek ordezkatzea proposatu zuen, negoziazioek aurrera egin ditzaten. "Horrelako adierazpenak ez doaz norabide zuzenean", adierazi du Trumpek.

Paradoxa da duela aste batzuk Zelenskiri "diktadore" deitu ziola Trumpek, gerra garaian hauteskundeak ez deitzeagatik. 

"Bigarren mailako muga-zergak" zer diren ere azaldu du AEBko presidenteak. "Errusiako petrolioa erosten dutenek ezingo dute AEBrekin negoziorik egin, eta % 25eko zerga gehigarria izango dute", azaldu du.

Dena dela, gaineratu du datorren astean berriro hitz egingo duela Putinekin, eta berriro esan du "harreman bikaina" duela errusiar presidentearekin, hots, haserraldia azkar pasatuko zaiola, "jokatu behar duen moduan jokatzen badu".

"Bonbardaketak" eta "muga-zerga gehiago" Irani

Iran ere badu jomugan Trumpek. Hain zuzen ere, "erasoak" eta "muga-zergak" areagotuko dituela hitzeman du, herrialde horrek AEBrekin arma nuklearrei buruzko akordio bat sinatzen ez badu.

"Akordiorik ez badago, bonbardaketak egongo dira. Sekula ikusi ez dituen erasoak ikusiko ditu Iranek", esan dio NBC kate estatubatuarrari.