Errusiak eta Ukrainak adostu dute su-eten planak aurkeztea eta 2.000 preso trukatzea

Errusiak eta Ukrainak adostu dute su-eten planak aurkeztea —bi aldeek aztertutako proposamenak izango dira— eta 2.000 preso trukatzea, Vladimir Medinski errusiar negoziatzaileak jakinarazi duenez.

"Beharrezkoa ikusten dugu negoziazioekin jarraitzea", esan du Medinskik komunikabideen aurrean, bilera bukatu berritan egin duen agerraldian.

Bi aldeen arteko konfiantza ariketa betean, Moskuk eta Kievek iragarri dute "datozen egunetan" trukatuko dituztela presoak.

2022ko otsailaren 24an gerra hasi zutenetik egingo duten gatibu truke handiena izango da aipatutakoa.

Horixe esan du, behinik behin, errusiar negoziatzaileak, Istanbuldik.

"Ukrainak eskatu digu bi estatuburuen arteko negoziazio zuzenak egotea. Proposamena kontuan hartuko dugu", esan du Kremlinaren ordezkariak.

Halaber, "pozik" agertu da gaurko hitzorduaren emaitzarekin, eta elkarrizketekin jarraitzeko asmoa erakutsi du.

2022tik lehenengoz bildu dira gaur Errusia eta Ukraina. Bestalde, Putin eta Zelenski 2019ko abenduan batzartu ziren azkenekoz, Parisen. Frantziako eta Alemaniako bitartekariek ere hartu zuten parte orduko hartan.

Europar buruzagiek Zelenki babestu dute

Europako buruzagiek babesa agertu diote Ukrainako presidente Volodimir Zelenskiri, eta "batasunerako" eta "konponbiderako" deia egin dute, Vladimir Putinek Istanbulgo bilerara ez joateko erabakiaren aurrean. Hiru urte zeramatzaten Errusiak eta Ukrainak gabe.

Europako Batzordeko presidente Ursula von der Leyenek atsekabetuta esan du mundu mailako ordena "mundu mailako desordena" bihurtu dela, eta "Putinen ideia inperialistak" eta "beste arrazoi geopolitiko batzuk" jo ditu horren errudun.

Frantziako presidente Emmanuel Macronek gogora ekarri du Ukrainako gerra guztiok "begiratzen" dugun gatazka bat dela. "Uste dut azken orduetan Errusiak argi utzi duela ez duela su-etenik nahi", salatu du.

"Errusia negoziazio mahaian esertzen ez bada, Putinek ondorioak ordaindu beharko ditu. Errusia jokatzen ari da, eta Ukraina bakearen alde egiten ari da", esan du Erresuma Batuko lehen ministro Keir Starmerrek.

Alemaniako kantziler Friedrich Merzek eta Italiako lehen ministro Giorgia Meloni ere mintzatu dira horretaz. "Neurri bateratuak" eta "fronte komun bat" eskatu dituzte biek.