Israelek 79 pertsona hil ditu Gazan, horietatik 9 ospitalean lanean ari zen pediatra baten seme-alabak

79 pertsona hil dira ostiral honetan Gazako Zerrendan Israelgo bonbardaketen ondorioz, Gazako Osasun Ministerioak jakitera eman duenez. Horien artean, Gaza hegoaldeko Nasser ospitalean lanean ari zen Alaa al Najjar pediatraren bederatzi seme-alabak. Senarra, medikua, oso larri zaurituta dago.

Ama Jan Juniseko ospitalean lanean ari zela iritsi ziren bere bederazi haurren gorpuak (Yahya, Rakan, Raslan, Jibran, Eve, Rivan, Luqman, Sadeen eta Sidra) bertara.  Hildako haur zaharrenak 12 urte zituen, Munir al Bursh Gazako Osasun Ministerioko zuzendari nagusiak azaldu duenez.

Adam izeneko semea eta pediatraren senarra, Hamdi Al Najjar doktorea, zainketa intentsiboetan daude, erredura larriekin.

Erasoaren irudi gogorrak zabaldu dira sareetan. Bertan, Gazako Defentsa Zibileko eta Palestinako Ilargierdi Gorriko operatiboak ikusten dira erreskate lanetan, haurren gorputz kixkaliak banan-banan ateraz, bonbardatutako etxetik.

Osasun Ministerioak doluminak eman dizkio pediatrari ohar bidez. Youssef Abu Al Rish medikuak ondorengo mezua zabaldu du "Bere seme-alabak Nasser Ospitalea beste tokirik ez duten haur gaixoak artatzeko utzi zituen, eta, goseak eta nekeak ahuldutako haur erregubeak artatzen ari zela hil dizkiote bereak".

Ia 54.000 hildako

Bestalde, Gazako Osasun Sailak larunbat honetan eguneratutako datuen arabera, 53.901 dira jada Israelek 2023ko urriaren 7tik Gazan hil dituenak. Hamasek egindako erasoaren mendeku gisa abiatu zuen Israelek eraso. 1.200 pertsona hil zituen egun hartan Hamasek eta 251 bahitu. 50 batek bahituta jarraitzen dutela kalkulatzen da.

Osasun Ministerioak gogorarazi duenez, gainera, ez dira Gazako Iparraldeko Gobernazioan hildakoak zenbatzen ari, oso arriskutsua delako bertan sartzea, eta, beraz, askoz ere gehiago izan daitezke hildakoak.

Israelgo Armadak agiri zabaldu du azken 24 orduetan Gazako "100 helbururi eraso" egin diela esanez, "Gazako erakunde terroristei, egitura militarrei, lurpeko babeslekuei eta beste azpiegitura terrorista batzuei" eraso egin diela idatziz, baina zehaztapen gehiago eman gabe.