Israeli zigorrak eta arma-blokeoa ezartzeko eskatu dio Sanchezek Von der Leyeni

Pedro Sanchez Espainiako gobernuburuak Ursula von der Leyen Europako Batzordearen presidenteari eskatu dio Europar Batasunak (EB) Israelekin duen elkartze akordioa bertan behera uztea eta Gazan egiten ari den sarraskiagatik Estatu sionistari arma-blokeoa ezartzea. Von der Leyenek "onartezintzat" jo du Zerrendako egoera.

Ohar batean, Espainiako Gobernuak adierazi du Sanchezek buruzagi alemaniarrari kezka helarazi diola palestinarrek bizi duten "hondamendi humanitarioa" dela eta, eta Israelen aurkako presioa areagotzeko zigorrak erabiltzearen garrantzia nabarmendu du, "inbasioa geldi dezan".

"Netanyahu Gazan egiten ari den legez kanpoko inbasioa geldiarazteko EB mobilizatzea eskatu diot, presio diplomatiko handiagoa aplikatuz, Elkartze Akordioa bertan behera utziz eta Israelen aurkako zigorrak martxan jarriz", idatzi du sare sozialetan Espainiako Gobernuko presidenteak.

Espainiak Palestina estatu gisa aitortu zueneko lehen urteurrenarekin bat egin duen bileran, Sanchezek Von der Leyeni helarazi dio "gazatarrak gaur egun biktima nagusi diren hondamendi humanitarioa" dela eta arduratuta dagoela, eta EBren eta Israelen arteko harremana arautzen duen akordioa bertan behera uzteko eskatu dio.

Hain zuzen ere, gaur Kaja Kallas Europar Batasuneko Kanpo Arazoetarako goi-ordezkariak esan du itun hori berrikusten dabiltzala dagoeneko, eta adierazi du "aukerak" aurkeztu ahal izango dizkiela EBko Atzerri ministroei ekainaren 23an egingo duten batzarrean.

Interkonexioak, muga-zergak, Mercosur, etxebizitza eta gastu militarra

Ekialde Hurbileko egoeraz gain, Sanchezek eta Von der Leyenek Iberiar penintsulako eta Europako gainerako lurraldeetako interkonexio elektrikoak zabaltzeko beharraz hitz egin dute, itzalaldi masiboa gertatu zenetik hilabete igaro ondoren.

Sanchezek eta Von der Leyenek, gainera, AEBko muga-zerga berrien ondorioz piztutako gerra komertzialaz hitz egin dute; izan ere, Espainiak Bruselaren estrategia babestu du, eta "batasunean eta elkarrekikotasunean oinarritutako 27 estatuen erantzuna mantentzearen" alde agertu da, Espainiako presidenteak adierazi duenez.

"Mercosurrekin merkataritza akordioa ixteko premiaz eta Batzordeak etxebizitza politika zabaltzeko beharraz" ere hitz egin dute biek, Espainiako Gobernuak ohar batean adierazi duenez.

Gastu militarrari dagokionez, Sanchezek esan du Espainiak "Ukrainaren eta Europako ekialdeko hegalaren defentsarekin" duen konpromisoa, eta Von der Leyeni azaldu dio Espainiak aliatuen "batez bestekoa baino hamar aldiz gehiago" inbertitzen duela bakea mantentzeko operazioetan, eta 3.000 militar baino gehiago dituela atzerrian.

Gainera, "gizarte eta ingurumen konpromisoekin bateragarria" den ahalegina egiteko prest agertu da Sanchez. Horregatik, Von der Leyenek txalotu egin du Espainiak gastu militarra handitzeko duen konpromisoa.