Muskek Etxe Zuria utziko du murrizketa ugari egin ostean, baina Trumpen aholkulari izaten jarraituko du

Elon Musk handi-mandiak gaur adierazi duenez, Etxe Zurian egiten duen lana utziko du inbertsio publikoa murrizteko arduradun gisa, baina Donald Trump AEBko presidentearen aholkulari izaten jarraituko duela ziurtatu du.

"Bisitatzen jarraituko dut, eta presidentearen laguna eta aholkularia izango naiz. Irrikaz itxarongo dut areto zoragarri honetara berriro itzultzeko unea", adierazi du, Trumpekin batera Bulego Obalean egindako agerraldian.

Munduko gizonik aberatsenak azaldu duenez, Gobernua utziko du "130 eguneko aldi baterako kontratua" amaitu zaiolako, baina "hau ez da DOGEren amaiera", Administrazio Federala murrizteko sortu zuen Gobernuaren Eraginkortasunerako Departamentua, nabarmendu du.

"DOGE lantaldea denborarekin sendotuko da. DOGEren eraginak hazten jarraituko du. Budismo antzeko bat da. Bizimodu bat bezalakoa da", goraipatu du.

Tesla eta SpaceX enpresetako kontseilari delegatuak adierazi duenez, orain arte zuzendu duen bulegoaren lanak "160.000 milioi dolar aurreztea lortu du herrialdearentzat", eta "laster 200.000 milioi dolarrera iritsiko dira".

Muskek AEBko Gobernutik behin betiko aterako dela iragarri zuen ostegunean, Trumpen egitasmo fiskal handiaren aurkako kritikak egin eta biharamunean.

Agerraldian, The New York Times egunkariaren artikulu bati buruzko galdera bati erantzuteari uko egin dio Muskek. Artikulu horrek hauteskunde-kanpainan zehar drogak kontsumitu izana leporatzen dio.

Handi-mandi estatubatuarra eskuineko begiaren ondoan ubeldura bat zuela agertu da, eta X bost urteko semearen ukabilkada baten ondorio dela esan du Muskek. "X txikiarekin txantxetan ari nintzen, eta esan nion: 'Tira, eman ukabilkada bat aurpegian'. Eta hala egin zuen", azaldu du.

Trump: "Musk munduak eman duen berritzailerik handienetakoa da"

Ekitaldian, Trumpek Muski buruz esan duenez, "munduak eman duen enpresa-lider eta berritzailerik handienetako bat da". "Bere talentu handia gure nazioaren zerbitzura jartzeko prest agertu zen, eta estimatzen dugu. Esan nahi dudan gauza bakarra da Elonek nekaezin lan egin duela, belaunaldietako gobernu-erreformarik erradikalena eta garrantzitsuena gidatzen lagunduz", azpimarratu du.

"Elon ez da guztiz joango. Hara eta hona ibiliko da. Irudipena dut (DOGE) bere semea dela, eta uste dut gauza asko egingo dituela (horren inguruan)", gaineratu du presidenteak. "Elonek AEBri eskainitako zerbitzua paregabea izan da historia modernoan", gaineratu du.